Адджын гагадыргъ — харбыз

0
179

Гагадыргътӕн сӕ тӕккӕ стырдӕр у харбыз ӕмӕ у адджын ӕмӕ пайда. Куыд иннӕ гагадыргътӕ, афтӕ харбызы дӕр ис пайдайаг буаргъӕд — оксиданттӕ.

Ахъаз у иммунитетӕн

Уыцы буаргъӕд ахъаз у иммунитетӕн, онкологон низтӕ цӕмӕй ма фӕзыной, уымӕн, стӕй хорз у цӕстытӕн. Уымӕй уӕлдай, сыгъдӕг кӕны уыргтӕ, адӕймагӕн йӕ царды дӕргъы дзы цы ӕппарӕнтӕ бамбырд вӕййы, уыдонӕй, стӕй ма дуртӕ дӕр ӕддӕмӕ тӕры, ӕмӕ афтӕмӕй сыгъдӕг кӕны организм.

Харбыз организмӕй дон ӕддӕмӕ кӕй тӕры, уый фӕрцы адӕймагӕн йӕ уӕзӕй ахауы уӕлдай килограммтӕ. Уымӕй уӕлдай, сӕтты ӕххормаг.

Харбызы ис ӕндӕр пайдайаг буаргъӕд — магний. Йӕ фӕрцы оганизм йӕхимӕ хуыздӕр айсы, нервыты системӕйӕн ӕмӕ хӕцъӕфты куыстӕн ахъаз чи у, уыцы витаминтӕ ӕмӕ минералтӕ.

Харбыз адӕймагӕн сӕтты йӕ дойны, нӕй дзы, организм йӕхимӕ зынтӕй кӕй айсы, ахӕм сӕкӕртӕ, уымӕ гӕсгӕ, сӕкӕрнизӕй рынчынтӕн дӕр харбыз хӕрын у пайда, ӕрмӕст ӕмбӕлгӕ бӕрцӕй. Уӕвгӕ, бӕрцыл хъуыды кӕнын хъӕуы алкӕддӕр, уымӕн ӕмӕ, харбызӕн йӕ бирӕ халы тъӕнгты куыст, ӕмӕ дзы адӕймаг фӕриссы.

Цӕмӕй тӕссаг у харбыз?

Харбыз цӕмӕй тагъддӕр срӕгъӕд уа, уый тыххӕй йын «дарынц» алыхуызон хъацӕнтӕ, фылдӕр уыдон сты нитраттӕ (натрийы, аммонийы, кальций ӕмӕ калийы нитраттӕ). Сӕхӕдӕг сӕхи ӕгъдауӕй уыдон афтӕ маргхъӕстӕ не сты, фӕлӕ ахсӕнмӕ ӕмӕ тъӕнгтӕм куы бахӕццӕ вӕййынц, уӕд сӕ рауайы, онкологон низтӕ расайын сӕ бон кӕмӕн у, ахӕм зианхӕссӕг нитриттӕ. Ӕгӕр куы алӕууы, уӕд нитраттӕй нитриттӕ рауайы харбызӕн йӕхи мидӕг дӕр. Нитриттӕ халынц туджы зилдух, уый фӕбӕрӕг вӕййы гемоглобиныл, гемоглобины ныллӕг бӕрӕггӕнӕн та расайы гипокси, ома, туаггуырӕй организм ӕххормаг ӕййафын райдайы. Ахӕм уавӕр уӕлдай тӕссагдӕр у сывӕллӕттӕн ӕмӕ зӕрдӕ ӕмӕ дадзинты низтӕй, улӕфӕнты низтӕй ӕмӕ, организмӕй дон ӕддӕмӕ чи тӕры, уыцы системӕйы низтӕй рынчынтӕн.

Адӕймаг харбызӕй маргхъӕстӕ кӕй фӕци, уый бӕрӕггӕнӕнтӕ

Адӕймаг харбызӕй маргхъӕстӕ кӕй фӕци, уымӕн йӕ бӕрӕггӕнӕнтӕ фӕзынынц, харбыз цы бон бахордта, уымӕй 1-2 боны куы рацӕуы, уӕд. Буары тӕвд сбӕрзонд вӕййы, адӕймаг ӕрлӕмӕгъ вӕййы, сӕр риссын байдайы, зӕрдӕ хӕццӕ кӕны, тъӕнгты куыст фехӕлы, адӕймаг омын байдайы.

Кӕмӕн нӕй харбыз хӕрӕн?

Харбыз цыфӕнды хорз уавӕрты куы срӕгъӕд уа, цыфӕнды хӕрззылд ӕмӕ цыфӕнды адджын ӕмӕ пайда куы уа, уӕддӕр дзы нӕй хӕрӕн:

цавӕрдӕр аххосӕгтӕм гӕсгӕ йӕ доныхуыпп ӕддӕмӕ зынтӕй кӕмӕн цӕуы, уыдонӕн;

гуыбыннизӕй рынчынтӕн ӕмӕ, ставд тъанджы низ — колит кӕмӕ ис, уыдонӕн;

сӕ уыргты ставд дуртӕ кӕмӕн ис, уыдонӕн, уымӕн ӕмӕ, уӕлдӕр куыд загътам, афтӕ, харбыз организмӕй ӕддӕмӕ тӕры дон, ӕмӕ уый аххосӕй дуртӕ сӕ бынатӕй фезмӕлынц.

Харбыз раст куыд хӕрын хъӕуы?

Йӕ ӕркӕрдыны размӕ йӕ хъӕуы ныхсын хъарм дон ӕмӕ сапонӕй. Харбызӕн карстӕй бирӕ дарӕн нӕй, ӕппынфылдӕр иу суткӕ уазалгӕнӕны. Йӕ фӕлмӕнтӕ кӕрдгӕйӕ, цъарыл хъуама зайа иу-ӕртӕ сантиметры бӕрц. Сывӕллӕттӕн дӕтгӕ у, астӕумӕ хӕстӕгдӕр чи уа, харбызы уыцы хай.

Афтӕмӕй, уӕхи хъахъхъӕнут ӕмӕ ӕнӕниз ут.

Медицинон профилактикӕйы республикон центр   

ОСТАВЬТЕ ОТВЕТ

Please enter your comment!
Please enter your name here