Уæлахиздзауты схорзæхджын кодтой

0
111

Сбæрæг сты аивадон конкурсы уæлахиздзаутæ. Ерыс арæзт æрцыд Хетæгкаты Къостайы номыл национ-культурон центры руаджы.

Ирыстоны ныридæгæн ис бирæ курдиатджын поэттæ, уый хыгъд Хетæгкаты Къостайы номыл центры кусджытæ æрхъуыды кодтой сывæллæтæн ерыс — зæрдæвæрдæй сахуыр кæнын æмæ бакæсын XXI æнусы фысджыты æмдзæвгæтæ. Дæрддзæфмæ ‘гъдауæй, видео исгæйæ, сывæллæттæ æрбарвыстой се ‘рмæджытæ. Кæй зæгъын æй хъæуы, жюрийы уæнгтæн æнцон нæ уыд уæлахиздзауты сбæрæг кæнын, фæлæ 350 сывæллонæй равзæрстой 20 — æппæты хуыздæрты.

«Мах иууылдæр уарзæм нæ мадæлон æвзаг, не ‘гъдау, нæ традицитæ. Фæнды нæ, иууылдæр куы дзуриккам нæ мадæлон æвзагыл, кæстæр фæлтæрæн куы æххуыс кæниккам, цæмæй тырной ирон чингуытæ кæсынмæ, цæмæй хистæртæн кад кæной, зоной нæ адæмы культурæ, традицитæ, æххæст сæ кæной. Мах, нæ республикæйы Фысджыты цæдис, Хетæгкаты Къостайы номыл æхсæнадон организаци, ныр дыккаг хатт сарæзтам ацы конкурс. Уым сывæллæттæ кæсынц æмдзæвгæтæ сæ мадæлон æвзагыл. Дыууæ конкурсы аразгæйæ дæр стыр куыст бакодта Хетæгкаты Къостайы номыл национ-культурон центры пресс-секретар Габолаты Индирæ, æмæ йын зæгъæм бузныг. Цавæрдæр фарстатæ лыг кæнгæйæ нæ фарсмæ вæййы Дзæуджыхъæуы муниципалон зылды сæрдар Икъаты Русланбег æмæ уымæн дæр — стыр бузныг. Фидæны, Хуыцауы фæндæй, сараздзыстæм æртыккаг конкурс æмæ та ацы залы фембæлдзыстæм. Фæнды ма мæ зæгъын бузныг Цæгат Ирыстоны Хицауады æмæ Администрацийы кусæг Бигъуылаты Людмилæйæн, йæ дæсныйад кæй уарзы æмæ сывæллæттыл афтæ зæрдиагæй кæй ауды, уый», — загъта Цæгат Ирыстоны Фысджыты цæдисы сæрдар Агънаты Гæстæн.

Ерысгæнджыты ‘хсæн ис гыццыл стъалы — Хацырты Вероникæ. Йæ æрдзæй лæвæрд курдиатыл ауды æмæ йæ бон у адæймаджы зæрдæ балхæнын.

Уæлахиздзаутæ дих æрцыдысты æртæ къордыл. Æхсæзаздзыд сывæллæтты къорды фыццаг бынат бацахста Хацырты Вероникæ Беслæныхъæуæй; дыккаг бынат дих кæнынц Муриты Ацæмæз, рæвдауæндон «Диалог»-ы хъомылгæнинаг, æмæ Плиты Ибрагим — Алагирæй; æртыккаг бынат дих кæнынц Гадзиаты Дзерассæ — Элхотæй æмæ Пæррæстаты Мария — Цхинвалæй.

Дыккаг къорды уæлахиздзаутæ сты сывæллæттæ 7 азæй 12 азмæ: фыццаг бынат бацахста Хуыдæлты Атей; дыккаг бынат дих кæнынц Хъæрæцаты Ацæмæз — Джызæлæй æмæ Гæджиты Давид — Дзæуджыхъæуæй; æртыккаг бынат дих кæнынц æртæ сывæллоны: Хетæгкаты Вероникæ — Цхинвалæй, Джиоты Ангелинæ — Дзæуджыхъæуæй æмæ Цгъойты Дианæ — Джызæлæй.

Æртыккаг къорды уæлахиздзаутæ сты æрыгæттæ 13 азæй 22 азмæ: фыццаг бынат бацахста Гæбæраты Владислав — Цхинвалæй; дыккаг бынат дих кæнынц Къуыдзилты Камиллæ — Дзæуджыхъæуæй æмæ Джагиты Аланæ — Цхинвалæй; æртыккаг бынат — Бестауты Миланæ Къуайсайæ, Бестауты Зауырбег æмæ Хæтæгты Камиллæ — Дзæуджыхъæуæй.

Зæрдиагæй æнхъæлмæ кæсæм фидæны æртыккæгæм ерысмæ.

 

Гобозты Агуындæ
Къам систа Хъайырты Дианæ

 

 

ОСТАВЬТЕ ОТВЕТ

Please enter your comment!
Please enter your name here