Сбæрæг сты æрыгон чемпионтæ

0
60

Хъуылаты Базийы номыл Спортивон галуан Манеж»-ы дыууæ боны (18-19 мартъийы) уæгъдибар хъæбысхæстæй Цæгат Ирыстоны фыццаг бынат бацахсыныл ерыс кодтой æрыгон (2007-2008 азты гуырд) богæлттæ.

Нæ республикæйы алы районты 400 æвзонг богалы сæ хъару æмæ арæхстдзинад æвдыстой æртындæс уæзы.
Æвзонг богæлтты ерыстæ рауадысты цымыдисаг. Алы уæзы дæр уыдис цалдæргай æмдых лæппуйы, æмæ уыдонæй алчидæр тырныдта 1-аг бынат бацахсынмæ. Куыд алы хатт, афтæ та ныр дæр æвзонг богæлтты тохты уыд бирæ æнæнхъæлæджы фæзындтæ, æмæ уымæй ерыстæ кодтой уæлдай цымыдисагдæр.
Æппæты рогдæр уæзы, (35 кг онг) кæронбæттæнмæ рацыдысты Хæдарцаты Асланы номыл Хъæбысхæсты академийы хъомылгæнинаг Елойты Сослан (йæ тренертæ — Санаты Георги æмæ Хъæцмæзты Ренат) æмæ Мæздæджы районы минæвар, тренертæ Джемалдин Очеретлов æмæ Юсуп Исмаиловы хъомылгæнинаг Ислам Альмурзаев. Сæ хъазуатон тох ахицæн Ислам Альмурзаевы пайдайæн, æмæ уый бацахста 1-аг бынат.
Сæ уæзы 3-аг бынæттæ бацахстой Саухалты Тамерлан æмæ Моурауты Æхсарбег.
38 кг онг уæзы кæронбæттæны фембæлдысты Андиаты Сосланы номыл скъолайы хъомылгæнинæгтæ Милдзыхты Зауыр (тренер Исахъты Георги) æмæ Джабраил Вердиев (тренер Биазырты Марик). Дыууæ æмбалы тохы фæуæлахиз Джабраил Вердиев.
41 кг онг уæзы 1-аг бынатыл кæронбæттæны тох кодтой Дзаттиаты Альберт (тренертæ — Санаты Георги æмæ Хъæцмæзты Ренат) æмæ Уаниты Давид (тренер Мзокты Алан).
Сæ фембæлды 8:1 хыгъдæй фæуæлахиз Дзаттиаты Альберт æмæ бацахста фыццаг бынат. Йæ фæстæ 2-аг æмæ 3-аг бынæттæ бацахстой Уаниты Давид (2-аг), Цогойты Тимур (3-аг) æмæ Муриты Азæмæт (3-аг).
Тренер Биазырты Маричы хъомылгæнинаг Тунжай Вердиев 1-аг бынат рамбылдта 44 кг онг уæзы. Кæронбæттæны Тунжай 10:0 хыгъдæй фæуæлахиз Лæгкуты Артурыл (тренер Тыбылты Цезæр). Афтæмæй Вердиевтæ дыууæ ‘фсымæрæй дæр систы ерысты уæлахиздзаутæ. Ацы уæзы 3-аг бынæттæм рацыдысты Амаль Закароев æмæ Икъаты Хасан.
Тынг хъазуатон рауадис кæронбæттæны фембæлд 48 кг онг уæзы мæздæггаг богал Арсланбек Абуков æмæ æрыдойнаг тренертæ Дзукъаты Кахабер æмæ Челæхсаты Бердийы хъомылгæнинаг Елеты Сæрмæты ‘хсæн. Сæ фембæлды разæй цыдис Сæрмæт, фæлæ ма, сæ тохы кæронмæ 20 секунды куы баззад, уæд Абуков фæцарæхст æмæ йæ ныхмæлæууæгæй 2 баллы рамбылдта. Афтæмæй мæздæггаг богал фæуæлахиз 5:4 хыгъдæй.
Сæ фæстæ 3-аг бынæттæ бацахстой Хуыгаты Давид æмæ Эрик Джангаев.
52 кг онг уæзы 1-аг бынат бацахста Хуссар Ирыстоны минæвар Хъосты Арсен. Йæ тренер у йæ фыд Хъосты Тамерлан.
Ацы уæзы 2-аг бынатмæ рацыд Дзидзойты Эрик (тренертæ Дзукъаты Кахабер æмæ Челæхсаты Берди), 3-аг бынæттæ та бацахстой Зæнджиаты Иссæ æмæ Калоты Аслæнбег.
Рахизфарсы районы тренертæ Æрчъегкаты Георги æмæ Дудайты Эльбрусы хъомылгæнинаг Гæриты Ацæмæз 1-аг бынат бацахста 57 кг онг уæзы. Кæронбæттæны Ацæмæз 12:2 хыгъдæй фæуæлахиз Æлборты Вадим æмæ Чекойты Юрийы ахуыргæнинаг Хуыбежты Рустамыл (Горæтгæрон район). Сæ уæзы 3-аг бынæттæм рацыдысты Кочысаты Дамир æмæ Сидæмонты Артур.
Ноджыдæр ма иу мæздæггаг богал, тренертæ Джемалдин Очеретлов æмæ Юсуп Исмаиловы хъомылгæнинаг Исмаил Элесханов 1-аг бынат бацахста 62 кг онг уæзы. Кæронбæттæны йæ ныхмæлæууæг уыд Горæтгæрон районы тренертæ Кокойты Таймураз æмæ Исахъты Георгийы хъомылгæнинаг Къадзаты Руслан.
Фембæлд рауад тынг хъазуатон. Фыццаг размæ рацыд Руслан, фæлæ йæ ныхмæлæууæг дæр тырныдта хыгъд йæхи пайдайæн раивынмæ. Фембæлды фыццаг æмбис ахицæн 8:6 хыгъдæй Къадзаты Русланы пайдайæн. Дыккаг æмбис дыууæ богалы дæр кæд размæ бырсыныл архайдтой, уæддæр тынг къæрцхъус уыдысты сæхи фæрæдийынæй хъахъхъæнгæйæ. Фембæлды кæронмæ ма цалдæр секунды куы баззад, уæд Элесхановæн бантыст фæд-фæдыл 4 баллы рамбулын, æмæ сæ тох ахицæн 10:8 хыгъдæй Исмаилы пайдайæн. Афтæмæй мæздæггаг æвзонг богæлттæ рамбылдтой 3-аг сыгъзæрин майдан.
Мæздæджы спортивон скъолайы директор Джемалдин Очеретлов сæ хъомылгæнинæгты архайды тыххæй загъта: «Нæ лæппутæ тынг зæрдиагæй цæттæ кодтой сæхи ацы ерыстæм, æмæ сæ фыдæбон фæрæстмæ. Фыццаг бынæттæй уæлдай ма нæм ис дыууæ 3-аг бынаты дæр. Уый махæн нæ уавæртæм гæсгæ, у хорз æнтыстдзинад. Бæргæ, нæ кусæн бынат стырдæр æмæ æппæтæй ифтонгдæр куы уаид, уæд нæ хъомылгæнинæгтæн сæ фадæттæ фæхуыздæр уаиккой, æмæ сæ нымæц дæр фылдæр кæнид. Ныртæккæ нæ фæсивæдимæ кусæм Юсуп Исмаилов æмæ Европæйы чемпион Шавал Османовимæ. Кæд нæ кусæн зал къуындæг у, уæддæр тырндзыстæм, нæ кæстæрты фидæны стырдæр ерыстæм куыд гæнæн ис, афтæ хуыздæр бацæттæ кæнынмæ».
Иннæ уæзты призон бынæттæ бацахстой: 68 кг — 1-аг — Хъоцлаты Арсен (тренертæ Рубайты Руслан æмæ Хъосты Витали), 2-аг — Танкълаты Сæрмæт, 3-аг — Ислам Усманов æмæ Ботъоты Сæрмæт, 75 кг — 1-аг — Тогойты Артур (тренер Кокайты Руслан), 2-аг — Пухаты Роланд (тренер Хъосты Тамерлан), 3-аг — Битарты Сæрмæт æмæ Хъуылымбегты Тамерлан, 85 кг — Санахъоты Радион (тренер Наниты Зураб), 2-аг — Гаджиты Астан (тренер Габеты Валери), 3-аг — Хъаныхъуаты Хъазыбег æмæ Лохты Тимур, 100 кг — 1-аг — Хуыгаты Сæрмæт (тренер Хъосты Витали, Хæллаты Вячеслав), 2-аг — Туаты Тамерлан (тренертæ Æлборты Майрæм, Æлборты Вячеслав), 3-аг — Абайты Азæмæт æмæ Кокойты Давид. +100 кг — 10-æм — Сланты Тамерлан (тренер Æрчъегкаты Тотрадз), 2-аг — Вардан Карапетян (тренер Бикойты Виссарион).
РЦИ-Аланыстоны ацы кары богæлтты иугонд командæйы хистæр тренер Санаты Георги ерысты ацыды тыххæй загъта: «Пандемийы аххосæй кæстæр фæсивæдимæ куыст кæд къуылымпытæ баййæфта, уæддæр нæ æвзонг богæлттæ зæрдиагæй архайдтой се ‘ппæт гæнæнтæй дæр спайда кæнынмæ. Иу къорд лæппуйы равдыстой хорз цæттæдзинад, æмæ ныр сæ хъару æмæ арæхстдзинад æвдисдзысты Цæгат Кавказы федералон зылды фыццаг бынат бацахсыныл ерысты. Уыдон цæудзысты 15-17 апрелы Налцыччы. Уым йæхи хуыздæр чи равдиса, уыцы богæлттæ балцæгтæ райсдзысты, майы Мæскуыйы цы Уæрæсейы фыццаг бынат бацахсыныл ерыстæ цæудзысты, уырдæм».

Баскаты Уырызмæг

 

ОСТАВЬТЕ ОТВЕТ

Please enter your comment!
Please enter your name here