Кæстæрты амондджын фидæн — сæ сагъæс, сæ мæт

0
128

Сывæллонæй зынаргъдæр ацы царды цы ис? Ницы! Алы сывæллон дæр у хицæн дуне, алкæй зæрдæмæ дæр бахъæуы фæндаг ссарын. Уый та хистæрæй домы удыхъæды бирæ хорз миниуджытæ — фæлмæнзæрдæдзинад, куырыхондзинад, зæрдæйы хорзæх… Стæй ма уымæй уæлдай, бирæ зонындзинæдтæ. Æппæт уыдонæй хайджын сты Дзæуджыхъæуы сывæллæтты 3-æм рæвдауæндоны хъомылгæнджытæ, сæ сæргъы директор МАХЪОТЫ Фатимæ, афтæмæй.

Уый сæргълæууæгæй кусы рæвдауæндонæн йæ фыццаг бонтæй — 1978 азæй фæстæмæ. Уымæй размæ та лæууыд æндæр рæвдауæндоны сæргъы.
— Нæ рæвдауæндоны ис сывæллæтты 12 къорды. Ныртæккæ нæм цæуы бирæ сывæллæттæ — 430, сты, 2-аздзыдтæй скъоламæ бацæуыны кары онг. Семæ зæрдиагæй кусынц дæсны хъомылгæнджытæ, стæй сæ хæдивджытæ. Нæ сывæллæттæ адджынæн бахæрынц, нæ дæсны хæринаггæнджытæ сын кæй скæнынц, уыцы аходæн, сихоры, стæй фæссихоры хæрд æмæ æхсæвæр. Рæзгæ сывæллоны цыдæриддæр хъæуы, æппæт уыцы хъæугæ хойрагæй сæ фынг у хъæздыг, — загъта рæвдауæндоны сæргълæууæг.
Ацы ран сывæллæттæ сæ рæстæг æрвитынц хъæлдзæгæй æмæ цымыдисæй. Рæзынмæ, сæхи ирхæфсынмæ дзы ис æппæт фадæттæ дæр — сæрмагондæй семæ ахуыргæнæг кæм кусы, ахæм физкультурон зал, бассейн, хъазæн фæзтæ. Ис сæм ирон æвзаг, ирон æгъдæуттæ сын кæм амонынц, ахæм кабинет дæр, хонынц æй ирон студи. Сывæллæтты ахуыр кæнынц къордгай.
— Хъыгагæн, нæ кæстæртæ нæ дзурынц иронау, нæ зонынц сæ мадæлон æвзаг. Уый у нæ сагъæссагдæр фарстатæй иу, æмæ йыл нæ хъомылгæнджытæ архайынц. Ис нæм ирон æмæ уырыссаг къордтæ, æмæ семæ кусы ирон æвзаджы ахуыргæнæг. Сывæллæттæ ахуыр кæнынц ирон æмдзæвгæтæ, аргъæуттæ. Нæ музыкæйы ахуыргæнæг уырыссаг у, фæлæ сын фæамоны ирон зарджытæ дæр. Æцæг хæдзармæ æрбацæугæйæ, ирон ныхас сывæллон куы нæ хъуса, уæд хъуыддаг размæ зынтæй цæуы, — бафиппайдта Фатимæ.
Сывæллæтты ахуыр кæнынц кафыныл дæр, стæй канд ирон кæфтытæ нæ. Алы кафтæн дæр рæвдауæндонæн йæхимæ ис сæрмагонд уæлæдарæс. Рауагъдонты къорд рæвдауæндонæй куы фæфæндараст кæнынц, уæд алы аз дæр бацæттæ кæнынц диссаджы рæсугъд бæрæгбон æмæ йæм æрбахонынц ныййарджыты, хистæрты, цæмæй феной, сæ сывæллæттæ рæвдауæндоны цы базыдтой, цæуыл сахуыр сты, уый.
Фатимæ ма куыд радзырдта, афтæмæй сæм ис, се ‘нæниздзинадмæ гæсгæ сæ авналæнтæ цыбыр кæмæн сты, ахæм сывæллæтты хъомыл кæнынæн хорз уавæртæ дæр. Рæвдауæндонмæ бацæуæны ис пандус, рынчын сывæллæттæн та — сæрмагонд физтеркабинет æппæт хъæугæ ифтонггæрзтимæ дæр.
Уæвгæ, сывæллæтты æнæниздзинадмæ ацы ран ис бæстон цæстдард. Уымæн æмæ рæвдауæндонæн йæ нысанарæзт у физкультурон-дзæбæхгæнæн куыст. Ис сæм дохтыр-физиотерапевт, медицинон хо. Сывæллæттимæ кусы психолог. Уымæ гæсгæ, пандемийы рæстæг æппæт рæвдауæндæттæ дæр æхгæд куы уыдысты, уæд дæр, 3-æм рæвдауæндон æхгæд æрцыд иннæтæй фæстагдæр, уымæн æмæ, иуæрдыгæй сæ хъомылгæнинæгты нымæц бирæ у, иннæрдыгæй та сын се ‘нæниздзинадыл цæуы биноныг куыст. Æртæ азы размæ сæм уыд уазджытæ Пятигорскæй æмæ семæ æрбаластой цæххæй улæфæн аппараттæ. Уыдон тынг ахъаз сты сывæллæтты æнæниздзинадæн. Фæлæ уазджытæ ацыдысты, сывæллæтты æнæниздзинад та домы æрвылбоны архайд.
— Æмæ уæд ме ‘мкусджытимæ иумæйаг уынаффæйы æрцыдыстæм ахæм хъуыдымæ: саразæм цæххæй улæфыны «лæгæт». Æмæ йæ сарæзтам. Мæскуыйæ сластам, чи хъуыд, ахæм аппарат, æмæ ныр, алы фæззæг æмæ алы уалдзæг дæр рынчынтæ куы сбирæ вæййынц, уæд уыцы афон сывæллæттæ фæулæфынц ацы аппаратæй. Уый сын у стыр ахъаз се ‘нæниздзинадæн, — хатдзæгтæ кæны Фатимæ.

Уæ размæ цы лыггæнинаг хъуыддæгтæ ис, уыцы фарстайæн дзуапп дæтгæйæ, Махъоты Фатимæ загъта:
— Ныртæккæ бирæ фæсивæд цæуы уæлдæр ахуыргæнæндæттæм. Махæн ис бадзырд Цæгат Ирыстоны паддзахадон университеты педагогон факультетимæ, æмæ нæм алы аз дæр практикæмæ æрбарвитынц студентты. Фæлæ хъомылгæнæджы куыстмæ сæ фылдæр сæ хъус нæ дарынц, дыууæ — æртæ адæймагæй фæстæмæ. Æмæ уый у сагъæссаг хъуыддаг.
2010 азæй нырмæ рæвдауæндон цалцæггæнæн куыстыты аххосæй æхгæд никуыма ‘рцыд. Чи дзы бахъæуы, уыцы куыстытæ сæххæст кæнынц нæ кусджытæ сæхæдæг, сæхи хъарутæй, суанг сæ фæлладуадзæн бонтыл нæ бацауæрдынц, сæ рæвдауæндон рæсугъд æмæ аив уæд, уый йеддæмæ.
— Рæвдауæндон йæ къæхтыл слæууа, æмæ куыст æнтыстджындæр уа, уымæй нæм йæ рæстæджы тынг фæкаст Ахуырады министрады хайады уæды сæргълæууæг Дзанайты Марк, æмæ дзы бузныг стæм абон дæр.
Æхсæз азы размæ Дзæуджыхъæуы 3-æм рæвдауæндон ссис, сывæллæтты хъомылады ногдзинæдтæй æнтыстджынæй кæм пайда кæнынц, Уæлæмхасæн ахуырады академийы уыцы фæзтæй иу. Ацы программæмæ гæсгæ æххæст кæнынц бирæ мадзæлттæ: алы аз дæр хъомылгæнджытæ архайынц вебинарты, сæ ‘хъомылгæнинæгтимæ та — алыхуызон конкурсты, бацахсынц дзы уæлдæр бынæттæ. Зæгъæм, ацы аз бацахстой дыккаг бынат республикон конкурс «Иры фидæн»-ы…

Хекъилаты Земфирæ,
ЦИПУ-йы
журналистикæйы
факультеты
2-æм курсы студенткæ

ОСТАВЬТЕ ОТВЕТ

Please enter your comment!
Please enter your name here