РЦИ-Аланийы Сæргълæууæг Сергей Менæйлойæн кусæг фембæлд уыд Транспортон машинæтæ аразæн Урайлаг заводы коммерцион директор Алексей Серковимæ.
Фембæлды рæстæг фæбæрæг кодтой, куыстуат æмæ Дзæуджыхъæуы бынæттон хиуынаффæйады администраци цы бадзырд бафыстой, уый фæзилæнтæ. Хъуамæ транспортон машинæтæ аразæн заводæй райсæм 28 трамвайон вагоны, 71-412 хуызимæ, хъæрæй ныхас дзы куыд хъуыса, æрлæууæн бынæттæ æвдыст куыд цæуой, ахæмтæ.
Ацы азы кæрон уал фыццаг парти республикæмæ фæзындзæн. Æххæстæй трамвайтæ Цæгат Ирыстоныл сæмбæлдзысты 2023 азы фыццаг æмбисы. Цалынмæ трамвайтæ кусой, уæдмæ сын завод лæггад кæндзæн, уый фыст ис бадзырды. Сергей Меняйло куыд загъта, афтæмæй уыцы фæтк хорз у, уæд трамвайты куысты хæрзхъæддзинад бæрзонддæр кæндзæн.
Фарон республикæ уыцы куыстмæ бавнæлдта, Мæскуы æмæ Бетъырбухы специалисттæ иумæ аразынц цæрджытæн транспорты лæггæдтæ кæныны схемæ.
