Дыгуры районы Хъарман-Сындзыхъæуы байгом, сывæллæттæн 120 бынаты кæм ис, ног ахæм рæвдауæндон. Арæзт æрцыд национ проект «Демографи»-йы фæлгæты.
Рæвдауæндон байгом кæныны бæрæгбонмæ æрбацыдысты республикæйы ахуырад æмæ наукæйы министр Алыбегты Эллæ, Дыгуры районы сæргълæууæг Цагъаты Сослан æмæ районы бынæттон хиуынаффæйады администрацийы сæрдар Туккаты Рустам.
— Нæ республикæйы фылдæрæй-фылдæр кæнынц ног скъолатæ æмæ рæвдауæндæттæ. Ацы ног рæвдауæндонмæ Хъарман-Сындзыхъæуы цæрджытæ æнхъæлмæ рагæй кастысты, уымæн æмæ сæм рæвдауæндон раздæр нæ уыд, æмæ ныййарджытæ сæ сывæллæтты ластой æндæр хъæутæм. Ног равдауæндонмæ цы сывæллæттæ цæудзысты, уыдоны нымæц ныридæгæн у 100. Уæлæмхасæн ахуырадæн дзы ис æппæт фадæттæ дæр, — загъта Алыбегты Эллæ.
Сæ кармæ гæсгæ рæвдауæндоны ис сывæллæтты фондз къорды, сæ иу — хæрзчысылты къорд. Рæзынæн æмæ ахуыр кæнынæн дзы сывæллæттæн ис алыхуызон фадæттæ дæр — музыкалон, физкультурæйы, медицинон кабинеттæ. Аивгонд æрцыд рæвдауæндоны алыварс дæр. Кусджыты нымæц у 30 адæймаджы.
Бæрæг куыд у, афтæмæй национ проект «Демографи»-йы фæлгæты ныридæгæн Горæтгæрон районы дæр байгом дыууæ рæвдауæндоны — Джызæлы æмæ Дæллаг Санибайы. Афæдзы кæронмæ ма республикæйы байгом уыдзæн фондз рæвдауæндоны.
ГÆЛÆУТЫ Наталья
