Цæгат Ирыстоны дарддæр æххæстгонд цæуынц æнæниздзинад хъахъхъæнынады системæйы фыццаградон къæпхæны нывылдзинады мадзæлтты программæ.
Амынд программæйы сæйрагдæр нысан у амбулаторитæ æмæ фелсырон-акушерон пунктты медицинон æмæ техникон ифтонгдзинад нывылдæр кæнын.
Уыцы нысантыл кусгæйæ, æндæрæбон Дзæуджыхъæуы цы кадджын æмбырд сарæзтой, уым ног хæдтулгæтæ байуæрстой республикæйы хъæууон районты цалдæр поликлиникæ æмæ амбулаторийæн.
Хъæууон медицинон кусæндæтты минæвæрттæн ног техникон фæрæзты дæгъæлтæ радта Цæгат Ирыстоны æнæниздзинад хъахъхъæнынады министр Тебиаты Сослан.
Уыцы бонæй фæстæмæ ног хæдтулгæтæй пайда кæндзысты Алагиры районы Центрон рынчындоны поликлиникæ æмæ Майрæмададжы амбулаторийы, Дыгуры районы Хъарман-Сындзыхъæуы амбулаторийы, Æрæфы районы Центрон рынчындоны поликлиникæ æмæ Быдыры Дæргъæвсы амбулаторийы, Æрыдоны районы Мичурины æмæ Нартыхъæуы амбулаториты, Горæтгæрон районы Ногиры амбулатори æмæ Мæздæджы районы Притеречнæйы поселочы амбулаторийы.
Æнæниздзинад хъахъхъæнынады министрады бæрнон кусджытæ куыд фæбæрæг кодтой, афтæмæй программæйы мадзæлттæ дарддæр дæр æххæстгонд цæудзысты.
Нæ уацхæссæг
