Экономикæ æмæ социалон къабазы нывыладæн

0
75

Ивгъуыд фæлладуадзæн бонты Цæгат Ирыстоны кусæг балцы уыд Уæрæсейы Хицауады Сæрдары хæдивæг Александр Новак. РЦИ-Аланийы Сæргълæууæг Сергей Меняйло æмæ Цæгат Ирыстоны Хицауады уæнгтимæ федералон чиновник бабæрæг кодта, сæрмагонд паддзахадон программæтæ æмæ фыццаградон национ проектты фæлгæты Дзæуджыхъæуы цы ахсджиаг социалон объекттæ арæзт æмæ цалцæггонд цæуы, уыдонæй цалдæр.

Фыццаджы-фыццагдæр, фысымтæ республикæйы уазæджы базонгæ кодтой курдиатджын сывæллæттæ æмæ фæсивæды ахуырады центр «Вершина»-йы архайдимæ. Зындгонд куыд у, афтæмæй ацы ног хъомыладон-ахуырадон кусæндон республикæйы фæзынд фыццаградон национ проект «Ахуырад»-ы уагæвæрдмæ гæсгæ. Ног центр ифтонг æрцыд æппæты нырыккондæр ахуырадон кусæнгæрзтæй. Ахуыр дзы кæнынц 5-11-æм кълæсты 250 скъоладзауы. Рæзгæ фæлтæры æппæтвæрсыг ахуырад æмæ курдиат раргом кæнынæн «Вершина»-йы ис æппæт фадæттæ дæр: ахуырадон кълæстæ, лекцион аудиторитæ, лабораторитæ, чиныгдон, конференц-зал, сфæлдыстадон æрмадзтæ, спортивон зал, хæрæндон æмæ афтæ дарддæр.
Александр Новак разыйæ баззад, ног центры ахуырдзаутæн цы хорз фадæттæ сарæзтой, уымæй.
— Ахæм нырыккон ахуырадон центрты куыст уæлдай ахадгæ у, уымæн æмæ уыдон ахъаз сты сывæллæтты курдиат ирддæрæй раргом кæнынæн. «Вершина» æмæ иннæ ахæм центрты чи хъомыл æмæ ахуыр кæны, уыцы фæсивæды къухы уыдзæн нæ бæстæйы фидæн. Центры коллективæн мæ зæрдæ зæгъы арфæйаг æнтыстдзинæдтæ сæ бирæвæрсыг куысты, — загъта УФ-йы Хицауады Сæрдары хæдивæг.
Уый фæстæ инспекцион къорды уæнгтæ бабæрæг кодтой республикон стадион «Спартачы» фæз. Зындгонд куыд у, афтæмæй фæстаг цалдæр азы дæргъы ацы ахсджиаг спортивон объект цæуы бындурон цалцæггонд. Аразæг куыстуаты минæвæрттæ куыд радзырдтой, афтæмæй æппæт нысангонд куыстытæн ныридæгæн бакодтой сæ 25 проценты бæрц. Цæгат Ирыстоны арæзтад æмæ архитектурæйы министр Моргуаты Константины ныхасмæ гæсгæ, аразæг кусджыты размæ хæс æвæрд цæуы, цæмæй азы кæронмæ æппæт куыстытæн бакæной сæ 45 проценты бæрц.
«Спартачы» бындурон рацарæзтæн фæрæзтæ дихгонд æрцыдысты «РЦИ-Аланийы физикон культурæ æмæ спорты дарддæры райрæзт»-ы паддзахадон программæйы фæлгæты. Проектмæ гæсгæ, рацарæзты фæстæ стадионы уыдзæн 14 800 бадæн бынаты. Æппæт цалцæггæнæн куыстытæ дæр хъуамæ ахицæн уой 2023 азы 1 июлмæ. Уыимæ, стадионы рацарæзты проектмæ æрæджы цы ивддзинæдтæ хаст æрцыд, уыдоны фæрцы «Спартачы» кæнæн уыдзæн Уæрæсейы футболон профессион лигæйы хъæзтытæ дæр.
Дарддæр фысымтæ æмæ уазджытæ ацыдысты Цæгат Ирыстоны паддзахадон филармонимæ. Профилон ведомствæты минæвæрттæ Александр Новакæн бæстон радзырдтой, 2016 азы республикæйы Хицауад æмæ Гергиты Валерийы хæрзаудæн фонд филармонийы бæстыхайы цалцæгыл куыд бакуыстой, уый тыххæй. Ныр филармони æмæ Цæгат Ирыстоны Оперæ æмæ балеты паддзахадон театр систы Бетъырбухы Мариинаг театры Дзæуджыхъæуккаг филиалы дæлхайæдтæ.
Мæскуыйаг уазджытæм тынг цымыдисаг фæкаст филармонийы агъуыст. 150 азæй фылдæр цы агъуыстыл цæуы, уый хаст æрцыд Уæрæсейы культурæйы удварны хæзнаты номхыгъдмæ. Уыцы æууæл хынцгæйæ, аразджытæ æппæт фадæттæй бацархайдтой, цæмæй филармонийы бæстыхайы æддаг бакасты историон хуыз хъахъхъæд æрцæуа.
Мариинаг театры Дзæуджыхъæуккаг филиалы абоны уавæр æмæ дарддæры архайды нысанты тыххæй радзырдта хайады директор Сергей Банников. Йæ ныхасмæ гæсгæ, ныртæккæ куыст цæуы, цæмæй хæстæгдæр рæстæг филармонийы залы æвæрд æрцæуа орган. Кæй зæгъын æй хъæуы, уыцы æмæ æндæр ахæм ногдзинæдтæ фæуæрæхдæр кæндзысты концертон залы сфæлдыстадон фадæттæ…

Фæстæдæр Хицауады хæдзары сæрмагонд фембæлд уыд Александр Новак, Сергей Меняйло æмæ Уæрæсейы Президенты Æххæстбарджын Цæгат Кавказы федералон зылды Юрий Чайкайæн.
Ныхасы архайджытæ лæмбынæг æрдзырдтой Цæгат Ирыстоны дарддæры социалон-экономикон райрæзты нысантыл. Уыимæ, сæрмагонд æргом здæхт æрцыд, республикæйы социалон-экономикон рæзты сæраппонд Уæрæсейы Президент Владимир Путин хицауады федералон æмæ регионалон оргæнтæн цы амынддзинæдтæ радта, уыдон æххæст кæнынмæ.
Фембæлды архайджытæ куыд фæбæрæг кодтой, афтæмæй, амынд нысантыл кусгæйæ, УФ-йы Хицауад уæлæмхасæн мадзæлттæ аразы Цæгат Кавказы федералон зылды регионты экономикон хъомыс фидардæр кæнынæн, егъау инвестицион проекттæ царды рауадзынæн. Уыимæ, фыццаградон æргом здæхт цæуы нысанмæ арæзт паддзахадон программæтæ æмæ национ проекттæ æххæст кæныны хъуыддагмæ.
Æппæт уыцы нысантыл республикæ куыд кусы, уыцы пълантæ фæбæлвырд кодта Сергей Меняйло. Йæ ныхасмæ гæсгæ, Цæгат Ирыстон промышленносты, хъæууон хæдзарады, туризм æмæ иннæ къабæзты æххæст кæны цымыдисаг æмæ пайдайаг инвестицион проекттæ. Уымæй уæлдай, Хицауад æмæ профилон республикон ведомствæтæ кусынц æндæр ахсджиаг программæтæ дæр царды рауадзыныл.
Ныхасы рæстæг æрдзырдæуыд Дзæуджыхъæу æмæ Беслæны комплексон райрæзты пълантыл, туристон кластеры арæзтадыл, ахсджиаг социалон объектты рацарæзтыл, стæй æндæр вазыгджын хъуыддæгтыл.

Сланты Аслан

ОСТАВЬТЕ ОТВЕТ

Please enter your comment!
Please enter your name here