Цæгат Ирыстоны Хицауады хæдзары Дзанайты Барисы разамындæй арæзт æрцыд æмбырд. Фембæлды ныхас кодтой хъæууонхæдзарадон, экономикон, социалон, ахуырадон проекттыл.
Æмбырды фарстаты зынгæ хай бацахстой хъæууонхæдзарадон фарстатæ, проекттæ æмæ ног ивддзинæдтæ хаст æрцæудзысты хъæугæ закъæттæм. Ивгъуыд аз æмæ фидæны куыстыты тыххæй радзырдта РЦИ-Аланийы хъæууон хæдзарад æмæ хойраджы министр Къусраты Алан:
— Мах æххæст кæнæм программæ «Хъæуты иумæйаг райрæзт». Фарон программæ «Хъæуты нырыккон хуыз» æмæ «Хъæуты цалцæг»-мæ гæсгæ сцæттæ кодтам дæс проекты, семæ авд проекты «Хæдзæртты арæзтад»-ы программæйы фæлгæты. Проектты финансты хардз у иу миллиардæй чысыл фылдæр. Самадтам авд хæдзары Кировы районы Елхоты хъæуы Хъæууонхæдзарадон кооператив «Де-Густо»-имæ. Бацалцæг кодтам æртæ скъолайы, Бруты хъæуы амад цæуы ног скъола æмæ цалцæггонд æрцæудзысты доны хæтæлтæ. Хуымæллæджы амад цæуы спортивон комплекс, уыимæ, ивд æрцæудзысты доны хæтæлтæ Сунжæ æмæ Елхоты хъæуты дæр. Цыколайы та амад цæуы бирæуæладзыгон хæдзар, ацы аз уыдзæн цæттæ. 2023 азы кой куы кæнæм, уæд нæ бæрны ис æртындæс проекты, уыдонæй авд сты, фарон кæй райдыдтам, уыдон, æхсæз та — ногтæ: хъæу Веселойы доны хæтæлты ивынад, стыр донуадзæны амад Куырттаты комы хæххон хайæ Дзуарыхъæумæ, Суадагмæ æмæ Уæлладжырмæ, проект арæзт цæудзæн дыууæ азы дæргъы.
Хъæууон хæдзарад æмæ хойраджы министрады ног проекттæ баст сты амалхъомтæн субсидион æххуысимæ, иуæй-иу барадон фæтктæм хаст æрцæудзысты ивддзинæдтæ. Уымæй уæлдай, фембæлды æрныхас кодтой финансон фарстатыл, семæ кредиттæ республикæйы бюджетæн. Уымæй уæлдай, æрныхас кодтой Медицинон фæдзæхстады территориалон фонды кусджыты мызд исыны хъуыддагыл. Социалон къабазы та сидзæртæн лæвæрд цæудзысты сертификаттæ фæйнæ милуан 718 мин сомы фатер райсынæн. Ацы аз ахæм сертификаттæ райсдзысты 25 адæймаджы. Ахуырады къабазы фæзындзæн зынгæ ивддзинæдтæ — 2024 азмæ алы скъолайы дæр байгом кæндзысты спортивон клубтæ.
Гобозты Агуындæ
