РЦИ-Аланийы Хицауады Сӕрдары хӕдивӕг Тугъанаты Ларисӕ куыд фехъусын кодта, афтӕмӕй скъолаты 1170 рауагъдоны нысанмӕ арӕзт ахуырад райсынмӕ балӕвӕрдтой куырдиӕттӕ. Ацы къуыри конкурсон къамис йӕ куыст райдайдзӕн.
Ахуырады министрадмӕ балӕвӕрдтой 520 куырдиаты. Рауагъдонтӕй 610 се ‘ргом здахынц ӕнӕниздзинад хъахъхъӕнынадмӕ, 30 та хъавынц культурӕйы къабазимӕ сӕ цард бабӕттын.
Къамис йе ‘ргом здахдзӕн Иумӕйаг паддзахадон фӕлварӕны бӕрӕггӕнӕнтӕм, рауагъдоны хицӕн ӕнтыстдзинӕдтӕм, регионалон ӕмӕ федералон олимпиадӕты дипломтӕм. Уӕлдай аргъ кӕндзысты рауагъдоны социалон статусӕн. Республикӕйы Сӕргълӕууӕг Сергей Меняйло куыд фӕбӕрӕг кодта, афтӕмӕй сӕрмагонд ӕфсӕддон операцийы архайгӕйӕ чи фӕмард, уыдоны сывӕллӕттыл хъуамӕ фыццагдӕр аххӕссой. Уӕлдӕр ахуыргӕнӕндонмӕ бацӕуыны фӕтк хъуамӕ уа ӕмбӕрстгонд, бӕрнон ӕмӕ ӕргом.
Тугъанаты Ларисӕ куыд бацамыдта, афтӕмӕй ӕппӕт хабӕрттӕ ӕргомӕй хъусын кӕндзысты, равӕрдзысты сӕ гом порталты.
Саутӕты Тамилӕ
