Цæгат Ирыстоны Хицауады Сæрдар Дзанайты Барис фембæлд Уæрæсейы Федерацийы мадæлон æвзæгты институты директоры хæстæ æххæстгæнæг Илья НовокрещеновимÆ. Ныхас цыд мадæлон æвзаг бахъахъхъæнын, стæй нæ республикæйы Æппæтуæрæсеон конкурс «Мадæлон æвзаг æмæ литературæйы хуыздæр ахуыргæнæджы» кæронбæттæн къæпхæн саразыны тыххæй. Фембæлды архайдта Цæгат Ирыстоны ахуырад æмæ наукæты министр Алыбегты Эллæ.
Дзанайты Барис куыд загъта, афтæмæй республикæйы цæуы стыр куыст мадæлон æвзаг æмæ культурæ бахъахъхъæныны тыххæй. Уæлдай стыр æргом здæхт цæуы курдиатджын æрыгон ахуыргæнджыты сбæрæг кæнынмæ, хъуаг цæмæй æййафынц, уыдæттæй сæм фæкæсынмæ. Конкурсы тыххæй дзургæйæ, Дзанайты Барис загъта, 2022 азы ахæм Æппæтуæрæсеон конкурсы ирыстойнаг Бекъойты Янæйы уæлахиз, æнæмæнг, кæй сразæнгард кæндзæн йæ иннæ æмкусджыты дæр ахæм æнтыстытæм, рапарахат кæндзæн скъолатæ æмæ рæвдауæндæтты кусæг мадæлон æвзаджы ахуыргæнджыты фæлтæрддзинад.
Нæ республикæйы Сæргълæууæг Сергей Меняйлойы хъæппæрисæй ацы аз байгом уыдзæн Ирон æвзаджы рæзты центр, уым уыдзæн алы фадæттæ дæр ахуыр кæнынæн, наукон куыстæн, ахуыргæнæн чингуытæ æмæ программæтæ уадзынæн.
Уымæй уæлдай ма нæ республикæ федералон центримæ кусы ахуырады хабæрттæ нырыккондæр, хуыздæр кæныныл. Алы районы дæр арæзт цæуынц ног æмæ цалцæг кæнынц зæронд ахуырадон уагдæттæ, ифтонг сæ кæнынц хæрзхъæд, ног кусæн дзаумайæ.
Илья Новокрещенов та загъта: «Уæлдæр цы конкурсы тыххæй дзырдтам, уый кæронбæттæн Цæгат Ирыстоны саразынæн уыдис аккаг бындур — ирыстойнаг Бекъойты Янæйы уæлахиз 2022 азы. Ныр та ма нæ бæстæйы Ахуырады министрад рахаста уынаффæ уыцы ерысмæ ног номинаци бахæссыны тыххæй — рæвдауæндæтты хъомылгæнджытæн. Ныртæккæ уæ республикæмæ æрцыдысты Уæрæсейы 32 хуыздæр хъомылгæнæджы конкурсы архайынмæ. Уыцы ахсджиаг æмæ хъæугæ мадзал арæзт æрцыд æнаиппæй, куыддæриддæр хъæуы, афтæ”.
Конкурс «Мадæлон æвзаг æмæ литературæйы хуыздæр ахуыргæнæджы» кæронбæттæн цæуы дыууæ регионы — Хъæрæсе-Черкесты æмæ Цæгат Ирыстоны. Йæ бæрæггæнæнтæ та йын базондзыстæм райсом, 23 сентябры.
РЦИ-Аланийы
Сæргълæууæджы æмæ Хицауады
пресс-службæ
