Мæскуыйы Адæмон хæдзарады æнтыстдзинæдты æппæтуæрæсеон центры дарддæр йæ куыст кæны дунеон форум «Уæрæсе». Ивгъуыд къуырийы Республикæ Цæгат Ирыстон-Аланийы экспозици лæвæрд уыд культурæйы къабазы зынгæдæр цаутæн. Йæ архайджытæ та уыдысты республикæйы культурæ æмæ аивады минæвæрттæ.
Къуырийы дæргъы цæгатирыстойнаг стендтæ чи бабæрæг кодта, уыцы уазджытимæ фембæлдысты РЦИ-Аланийы культурæйы министры хæдивæг Хъуысаты Зæлинæ, нывгæнæг, Уæрæсейы нывгæнынады академийы кадджын уæнг Байцаты Людмилæ, сфæлдыстады къабазы иннæ кусджытæ. Фысымтæ æмæ уазджытæн-иу алкæддæр бацайдагъ зæрдæмæдзæугæ ныхас Ирыстоны культурæ æмæ аивады абоны уавæрыл, дарддæры райрæзты нысантыл… Кæй зæгъын æй хъæуы, стенды уазджытæм бирæ фарстытæ равзæрд. Цæгат Ирыстоны культурæйы ахсджиагдæр цаутæ æмæ зынгæдæр архайджыты цард æмæ сфæлдыстады тыххæй — æмæ сæ алчидæр фысымты ‘рдыгæй бæстон дзуапп райста.
Культурæйы къуырийы дæргъы нæ республикæйы экспозицийы фенæн уыд Цхуырбаты Оледжы, Цæрикъаты Билары, Джиоты Вадимы, Черчесты Таймураз æмæ иннæ курдиатджын скульпторты куыстытæ. Ацы автортæн се сфæлдыстад æнгом баст у ирон адæмы истори æмæ хъæздыг фыдæлтыккон æгъдæуттимæ. Уыцы хæдбындурдзинад аивадуарзджыты зæрдæты уæлдай цымыдисагдæр æнкъарæнтæ алкæддæр райгуырын кæны. Афтæ уыд ацы хатт дæр — экспозицийы уазджытæ хорз аргъ скодтой ирыстойнаг скульпторты æрмдзæфæн.
Уæдæ хъуыстгонд дизайнер Годжыцаты Изольдæйы æрмадзы хуыд национ уæлæдарæс дæр дисы кæй нæ бафтаудзæн? Ацы хатт зæрингуырд равдыста национ уæлæдарæсы коллекци «Адæмты хæлардзинад».
Форумæн йæ райдайæнæй абонмæ йæ иудадзыгон архайæг у ирон адæмон кæфтыты мæскуыйаг ансамбл «Алани». Æмæ уæдæ культурæйы къуыри æнæ «Алани»-йæ куыд рафидыдтаид? Ансамблы артисттæ аив акодтой «Хонгæ» æмæ иннæ национ кæфтытæ.
Культурæйы къуырийы фæлгæты арæзт æрцыдысты æндæр зæрдæмæдзæугæ æмæ цымыдисаг мадзæлттæ дæр.
Ацы куырийы та цæгатирыстойнаг экспозици лæвæрд у ахуырады къабазимæ баст æрмæджытæн.
Сланты Аслан
