Хетæгкаты Къостайы райгуырæн боны кадæн Цæгат Ирыстоны Медицинон академийы ацыд егъау поэтикон-музыкалон концерт. Архайдтой дзы уæлдæр ахуыргæнæндоны студенттæ, куыд Ирыстонæй, афтæ сыхаг регионтæ æмæ фæсарæнтæй. Æхсызгонæй бакастысты сæ арæхстдзинадмæ академийы ректор Олег Ремизов æмæ хуынд уазджытæ.
– Радон хатт бæрæг кæнæм, Александр Фадеев ирон адæмы Леонардо да Винчи кæй рахуыдта, уыцы Хетæгкаты Къостайы райгуырды 167 азы бон. Кæд йæ амæлæтæй бирæ рæстæг рацыд, уæддæр абон дæр йæ философон ахаст цардмæ, нывгæнынадмæ, йæ адæмы хъысмæтмæ фыццагау ахсджиаг сты нырыккон царды. Уыдæттыл дзурынц, фыссынц йæ цард æмæ сфæлдыстад иртасджытæ. Йæ фæдонтæн Къоста у удцырынгæнæг суадон. Чидæр Къостайы монументалон сурæтыл сахуыр, Соскъиты Владимир та йæ скульптурæйæ зæгъы, Хетæджы-фырты рынчын, æнæхъару буары ныфс кæй ис, – загъта æрбацæуджытæн уæлдæр ахуыргæнæндоны ректор. Бафиппайдта, залы кæй сты фæсивæд нæ алфамбылай регионтæй æмæ уыдонмæ дæр цымыдисдзинад кæй æвзæры, Ирыстон йæ классиктæм цы цæстæй кæсы, куыд сын аргъ кæны, уый. Æхсызгон ма уый дæр у, æмæ йæ сæхи цæстæй кæй уынынц, гæнæн ис, æмæ дзы сæхицæн хорздзинæдтæ дæр райсой, раргом кæной адæймаджы уæвынады фарстатæ. Ирон æвзаг чи зоны, уыдон ма иу хатт банкъардтой йæ ахадындзинад. Йе ‘мдзæвгæтæм хъусгæйæ та Къостайы сурæт ногæй сæвзæрдзæн сæ цæстыты раз.
«Я смерти не боюсь» æмæ йæ поэмæ «Фатимæ»-йæ скъуыддзаг бакастысты конгойаг чызджытæ, академийы студенттæ Принсия æмæ Грасс, стæй цардбæллон лæппу Жереми – уый дæр Конгойæ, уый та æмдзæвгæ «Неужели, Коста» бакаст. Стыр æхсызгонæй сæм байхъуыстой иууылдæр. Уæлдай æхсызгон уый уыд, æмæ сыхаг регионæй фидæны дохтыр Айсун Казымова йе ‘мдзæвгæ «Зонын» иронау кæй радзырдта. Плиты Зарифæ нырма фыццаг къахдзæфтæ кæны поэтикон фурды. Студенткæ бакаст, Хетæгкаты Къостайæн цы æмдзæвгæ «Кавказский гений» ныффыста, уый.
– Йæ поэзи, уæлдайдæр йе ‘мдзæвгæтæ, мæ зæрдæмæ хæстæг лæуд сты, диссаг у йæ прозæ. Канд ирæтты нæ, фæлæ ‘гас зæххы къорийы адæмтæ уарзыныл ахуыр кодта æмæ кæны. Афтæ зæгъæн ис, æмæ Хетæгкаты Къоста йæ цард æппæтæй дæр адæмæн снывонд кодта, – йæ ахаст номдзыд æмзæххонмæ райхæлдта, академийы цур цы аивадон дзырды къорд ис, уый разамонæг, 3-æм курсы студент Быдтаты Дзамболат. Бакаст йæ уарзон поэты æмдзæвгæ «Æнæхай».
– Кæцыфæнды адæмыхатты историйы, фæлтæртæ сæ хъысмæт кæй номимæ сбæттынц, ахæм адæймаг ис. Махæн уый у Къоста, æнусты дæргъы нæ фæткæвæрдмæ, денджызы был наутæн фæндагамонæг цырагъау граждайнаг хъæбатырдзинадмæ чи здахы, ахæм адæймаг. Нæ мадзал дæр «Бузныг дын!», зæгъгæ, хуымæтæджы нæ рахуыдтам, – йæ раныхасы бафиппайдта концерт саразæг Хуыбиаты Зæринæ – Цæгат Ирыстоны сгуыхт артисткæ.
Къостайы æмдзæвгæтæ иу иннæйы фæдыл сценæйы кастысты фидæны дохтыртæ, сæ аив кафт æмæ зардæй, фæндырдзагъдæй сбуц кодтой концертмæ ‘рбацæуджыты зæрдæтæ. Медицинон академийы адæмон кафты сгуыхт ансамбль «Цард», йæ разамонæг – Хуыбиаты Зæринæ, сæ арæхстдзинад равдыстой, репертуары цы ног кæфтытæ æрцыд æвæрд, уыдон, стæй раздæр дæр æхцонæй кæмæ кастысты, уыцы композицитæ.
Поэтикон-музыкалон концертæн йæ кæронбæттæны сценæйы айзæлыдысты куырттатаг «Чындзæхсæвы кафт»-ы зæлтæ, ансамблы хæдахуыр артисттæ рахызтысты сюитæйы архайд равдисынмæ. Концертмæ кæсджытæ стыр æхсызгонæй байхъуыстой нæ республикæйы адæмон артист Будайчиты Сухрабы зарджытæм.
ХУЫБИАТЫ Ларисæ,
къамтæ систа
Татьяна ШЕХОДАНОВА
