РЦИ-Аланийы национ политикæ æмæ æддагон бастдзинæдты министр БÆгъиаты Аланæн уыдис фембæлд нæ республикæйы дзыллон хабархæссæг фæрæзты кусджытимæ. Ныхас цыдис Цæгат Ирыстоны бирæнацион æмæ бирæконфессион æхсæнадты ахастдзинæдтыл, терроризм æмæ экстремизм ма ‘руадзыны мадзæлттыл, алыхуызон национ организацитæн æххуыс кæныны, æддагон бастдзинæдты, национ культурæ æмæ æвзаг хъахъхъæныны фарстатыл.
Министр куыд радзырдта, афтæмæй нæ республикæ æппæт ацы фарстатыл кусы бæстон æмæ биноныг. Абоны онг Цæгат Ирыстоны цæры 107 адæмыхатты. Уыдонæй 35 сты хицæн егъау æхсæнадтæ, кæцытæ стыр æвæрæн хæссынц нæ республикæйы адæмты ‘хсæн хæлар ахастдзинæдтæ аразыны хъуыддагмæ. Æмæ уыдонæй æппæты хъомысджындæр у æхсæнадон змæлд «Нæ Ирыстон», йæ сæргъы Лагкуты Вячеслав, афтæмæй.
— Хуымæтæг ныхæстæй нæй радзурæн ацы змæлды архайды тыххæй. 90-æм азты гуырдзиаг-ирон, ирон-мæхъхъæлон быцæутæ æмæ 2004 азы Беслæны цы стыр бæллæх æрцыд, уыцы цаутæ егъау тугныккалдмæ расайдтаиккой, ацы æхсæнадон организаци куы нæ уыдаид, уæд. Лагкуйы-фырты дæсны æмæ куырыхон амындæй, йæ хæлардзинады миниуджыты фæрцы нæ къухы бафтыд уавæр банывыл кæнын. Фæстæдæр æхсæнадон змæлд «Нæ Ирыстон» ссис æппæтдунеон конкурс «Нацийы сæрыстырдзинад»-ы премийы лауреат. Æхсæнадон змæлд алкæддæр, алы тыхст уавæртæн дæр вæййы сæ тæмæны. Абон дæр æххуыс кæны Украинæйы сæрмагонд æфсæддон операцийы нæ хæстонтæн. Ахсджиагыл нымад цæуы, нæ республикæйы цы бирæ конфесситæ ис, уыцы фарста дæр. Адæм алыхуызон динтыл хæст сты, æмæ министрады хæс у ацы хъуыддагмæ биноныг цæст дарын, къæрцхъус уæвын сæ алы архайдмæ дæр. РЦИ-Аланийы Юстицийы министрады хыгъды ахæм æхсæнадтæ ис 114. Уыдонæй, Дзæуджыхъæуккаг-Алайнаг епархи, Пысылмон æхсæнад æмæ Уырыссаг-чырыстон аргъуан сты нымад сæйрагдæртыл. Се ‘ппæтимæ дæр мах кусæм æнгом. Терроризм æмæ экстремизмы ныхмæ фарстатæм та иудадзыгдæр стæм къæрцхъус. Нæ цæст дарæм æрыгон фæсивæд æмæ рæзгæ фæлтæрмæ. Ацы ран профилактикон мадзæлттæ тынг ахъаззаг сты. Архайæм скъолаты æмæ уæлдæр ахуыргæнæндæтты куыст парахат кæныныл. Сбæрæг кæнæм, террористтæ цы бинонтæй рацæуынц, уыдоны дæр. Ацы азы райдайæнæй абонмæ ахæм бинонтæ сбæлвырд кодтам 52.
Ирон диаспорæтæ æмæ æхсæнадтæ канд нæ бæстæйы алы регионты нæ, фæлæ фæсарæнты дæр сты. Семæ бастдзинад дарæм. Архайæм алыхуызон мадзæлттæ аразыныл, цæмæй нæ республикæмæ цæуой æмæ сæ ирондзинады культурæимæ фылдæр зонгæ кæной. Цалдæр азы бацæттæ кæнæм цымыдисаг «Этнолагер». Æрхонæм фæсарæнтæй æрыгон ирон фæсивæды, Ирыстоны чи нæ райгуырд, ахæмты æмæ сæ базонгæ кæнæм нæ истори, культурæ æмæ традицитимæ. Æмæ ацы мадзалæн йæ фадæттæ æмæ уавæртæ æрвылаз дæр рæзынц, уæрæхдæр кæнынц йæ гæнæнтæ, — загъта Бæгъиаты Алан.
Пресс-конференцийы ма министр фехъусын кодта, нæ республикæйы Сæргълæууæг Сергей Меняйлойы Указмæ гæсгæ, ирон æвзаджы рæзтæн ахъаззаджы мадзал арæзт кæй æрцæудзæн. 2024 азы нæм фæзындзæн, «яндекс-тæлмацгæнæг» кæй хонынц, ахæм фæрæз. Ирон æвзаг чи нæ зоны, уыдонæн гæнæн уыдзæн уырыссаг кæнæ æндæр æвзагыл тексттæ иронмæ «яндекс-тæлмацгæнæг»-ы фæрцы тæлмац кæнын. Уымæй уæлдай м, Бæгъиаты Алан дзырдта, 2024 азы нæ республикæ кæй бæрæг кæндзæн Цæгат Ирыстоны автономийы 100, Ирыстон Уæрæсеимæ баиуы 250 æмæ Хетæгкаты Къостайы райгуырды 165 азы юбилейтæ.
Саутæты Тамилæ
