Уæд иу бон Хъылци сфæнд кодта цуаны ацæуын. Йæ дыууæхстон топп йе уæхскыл баппæрста, йе ‘ккойы афтид голлаг акодта æмæ хъæдмæ фæраст.
Хъæуы уынгты-иу йæ размæ исчи куы фæци, уæд-иу æй афарстой:
— Кæдæм цæуыс, Хъылци?
— Цуаны цæуын, цуаны, — дзуапп сын-иу авæрдта уый.
— Æфсатийы хорзæх дæ уæд! — зæгъгæ, йын арфæ кодтой уыдон дæр.
Хъылци хъæды фæаууон. Бон-изæрмæ рацу-бацу, разил-базил фæкодта æмæ — никуы æмæ ницы. Бафтыд иу æрдузмæ. Ам уал мæхи бафæсвæд кæнон, кæд дзы иу сырд уæддæр фæзынид, зæгъгæ, пыхсран æрæмбæхст æмæ æнхъæлмæ кæсы.
Изæрдалынгтæ кодта, афтæ Хъылци дæр фæстæмæ хъæумæ æрхæццæ.
— Хъылци, дæ голлаг афтид куы у? — фæрсынц æй Ныхасы лæгтæ.
— Уæллæй, иу дæр дзы мæ размæ нæ рацыд, — дзуапп сын авæрдта Хъылци æмæ æрхуымзæрдæйæ йæ хæдзармæ ныффардæг.
Гæбуаты Галинæ
