Æппæтуæрæсеон проект «Мечтай со мной» 3 азæй 17 азы онг сывæллæттæн æххуыс кæны сæ бæллицтæ сæххæст кæнынæн. Ацы проект у æппæтуæрæсеон акци «Бæллицты наз бæлас» саразæг.
Йæ нысан у, цæмæй Ног азы рæстæг фылдæр адæм баууæндой диссæгтыл æмæ зæрдæрухсæй сæмбæлой бæрæгбоныл. 2018 азы УФ-йы Президент Владимир Путин рахæцыд акци «Бæллицты наз бæлас»-ы фарс, æмæ уæдæй нырмæ сси традицион æмæ æрвылазон.
Стырæй, чысылæй алы адæймаг дæр цæмæдæр фæбæллы, вæййы йæм цавæрдæр нысантæ, æмæ йæ фæуырны, Ног азы йын, æнæмæнг, кæй сæххæст уыдзысты. Ахæм диссаджы рæстæг у Ног аз. Алчидæр хъуамæ архайа сыгъдæгзæрдæ уæвын æмæ æууæндын хорздзинæдтыл. Хъæуы фылдæр хорз хъуыддæгтæ аразын. Дæ алыварс чи ис, æххуысхъуаг чи у, уыдонæн баххуыс кæнын, балæггад кæнын.
РЦИ-Аланийы Сæргълæууæг Сергей Меняйло, Парламенты Сæрдар Тускъаты Таймураз, Хицауады Сæрдар Дзанайты Барис æмæ иннæ бæрнон кусджытæ сæххæст кодтой фæкæсынхъуаг сывæллæтты бæллицтæ. Акцийы архайдтой канд цæгатирыстойнаг сывæллæттæ нæ, фæлæ Луганск æмæ Донецкы сабитæ дæр.
Сывæллæттæм уыд алыхуызон бæллицтæ. Се ‘ппæтæн дæр, æнæмæнгæй, Ног азы къæсæрыл сæххæст уыдзысты. Зæгъæм, Алагиры цæрæг 17-аздзыд Ксения бæллы хуыйæн машинæмæ, Азнауры бæллиц та у — микроскоп, дзæуджыхъæуккаг 10-аздзыд Арсены æхсызгонæй хъæуы синтезатор. Запорожьейы облæст Черниговы районы цæрæг 4-аздзыд Назары та бафæндыд цавæрдæр диссаджы лæвар райсын.
Уадз æмæ Ног азы алы сывæллоны бæллицтæ дæр сæххæст уой. Уыимæ, алчидæр бæллы сабырдзинадмæ æмæ уæлахизмæ. Сыгъдæг цъæх арвы бын цæрынæй хуыздæр ницы ис.
Уæлахиз уæм не ‘ппæт дæр!
Гæбуаты Галинæ
