РЦИ-Аланийы Сæргълæууæг Сергей Меняйло сæххæст кодта фондз сабийы ногбонон бæллицы.
Алагираг æвддæсаздзыд чызг Ксенияйæн лæвæрд æрцыд, рагæй кæмæ бæллыд, ахæм хуыйæн машинæ. Дзæуджыхъæуккаг дæсаздзыд Арсен Сергей Меняйлойы номæй райста синтезатор, авдаздзыд Æзнауыр — микроскоп, æртындæсаздзыд Гоар — хъæбысæй хæцынмæ манекен. Уыцы дыууæ лæппуйы дæр цæрынц Дзæуджыхъæуы. Сæрмагонд «лæвар-сюрприз» — хъазæн комбайн та æрвыст æрцыд Запорожьейы облæсты Чернигово-Токмачанскы хъæумæ цыппараздзыд Назарæн.
Сывæллæтты ногбонон бæллицтæ ма сæххæст кодтой РЦИ-Аланийы Хицауады Сæрдар Дзанайты Барис, стæй вице-премьертæ, «Бæллицты наз бæласæй» райстой Æппæтуæрæсеон акцийы архайæг сабиты фыстæджытæ. Дзанайты Барис æриста æртæ хъазæны, сæ мидæг уыдис цыппар дзæуджыхъæуккаг сабийы бæллицтæ. Лæвæрттæ ма райстой уыдонæн сæ хотæ æмæ æфсымæртæ — æдæппæтæй аст сабийы. Цыппараздзыд Данæйæн радтой «зондджын» колонкæ, йæ æхсæзаздзыд хо Томæйæн — кукла Барби. Æртындæсаздзыд Эвелинæйы та фæнды дизайнер суæвын, æмæ йæм ныр ис планшет. Йæ хо, иуæндæсаздзыд Элинæ та бирæ уарзы музыкæ, æмæ уымæн дæр балæвар кодта «зондджын» колонкæ, сæ астаздзыд æфсымæр Батрадзæн — машинæ пультимæ. Æнæрæвдыдæй нæ баззадысты æхсæзаздзыд Эланæ — радтой йын электрон чиныг, лæвæрттæ райстой йе ‘фсымæр Давид æмæ йæ хо София.
Вице-премьер Платы Альбинæ Запорожьейы облæсты Заряйы хъæуы цæрæг цыппараздзыд Дарияйæн арвыста хъазæн æфсæнвæндаг. Вице-премьер Томайты Ирбеджы номæй фарастаздзыд дзæуджыхъæуккаг чызг Таирæйыл сæмбæлд велосипед. Вице-премьер Æгъуызарты Мурат та ноутбук балæвар кодта Михайловскы хъæуы цæрæг Ангелинæйæн. Уый иттæг хорз ахуыр кæны, стæй ма музыкæйы уроктæ исы. Ногбоны бæллицтæ сæххæст кодтой РЦИ-Аланийы Хицауады иннæ уæнгтæ дæр.
Уæ зæрдыл уын æрлæууын кæндзыстæм, Æппæтуæрæсеон акци «Бæллицты наз бæлас» кæй райдыдта ивгъуыд азы 15 ноябры æмæ ахæсдзæн ацы азы 24 февралы онг. Йæ нысан у, Уæрæсейы, уыдонимæ — Донецк æмæ Луганскы Адæмон Республикæты, Запорожье æмæ Херсоны облæстты, 3 азæй 17 азы онг кæуыл цæуы, уыцы сывæллæттæн æхсызгондзинад æрхæссын. Акци æххæстгонд цæуы 2018 азæй нырмæ Уæрæсейаг сывæллæттæ æмæ фæсивæдон змæлд «Фыццæгты змæлд»-ы хъæппæрисæй нæ бæстæйы фæзуаты æмæ иу кæны, хорз хъуыддæгтæ аразын кæй фæнды, ахæм мингай адæймæгты. Æрвылаз ногбонон бæллицтæ æххæст кæныны акцийы фæархайы Уæрæсейы Федерацийы Президент Владимир Путин.
РЦИ-Аланийы
Сæргълæууæг
æмæ Хицауады пресс-службæ
