Донецкы æмæ Луганскы Адæмон Республикæтæй, стæй Херсоны облæстæй лыгъд адæмы 20 сывæллоны бабæрæг кодтой Дзæуджыхъæуы Къомайты Русланы номыл космонавтикæйы скъола.
Ракетон æмæ космосон техникæйы райрæзты сæйраг цаутимæ кæй базонгæ кодтой, уыцы фæсивæдæн æмæ сæ ныййарджытæн равдыстой тæхæн аппаратты конструкцитæ, космосон ракетæты макеттæ æмæ зынаргъ экспонаттæ. Уымæй уæлдай, экскурси кæм ацыд, ахæм астрономон фæзмæ ‘рбацæуæг адæмæн уыд аууонон фатæгимæ хуры сахатмæ гæсгæ бæлвырд рæстæг базонын æмæ Хуры системæйы арæзтад биноныг рахатыны фадат.
— Экскурси æмæ мидисджын лекцийæн, æнæмæнг, уыдзæн хорз фæстиуджытæ. Уæвæн ис, æмæ фидæны фæсивæдæй исчи космосимæ баст уыдзæн, — зæгъы Дзæуджыхъæуы администрацийы нациты æхсæн ахастдзинæдты райрæзты фарстаты хайады хицау Дарчиты Зæринæ.
Дзæуджыхъæуы
администрацийы пресс-службæ
