УФ-йы Федерацийы Советы цы видеоконференци уыд, уым бæстон ныхас рауад, сывæллæтты фæлладуагъд æмæ æнæниздзинад фидардæр кæныны кусæндæтты модернизацийы федералон программæ куыд æххæстгонд цæуы, ууыл.
Валентинæ Матвиенко сæрдариуæг кæм кодта, уыцы æмбырды архайдтой Федерацийы Советы уæнгтæ, Уæрæсейы рухсады министр Сергей Кравцов, стæй регионты минæвæрттæ. Цæгат Ирыстонæй фембæлды архайдта сенатор Виталий Назаренко.
Ныхасы архайджытæ куыд фæбæрæг кодтой, афтæмæй сывæллæтты фæлладуагъд æмæ æнæниздзинад фидардæр кæныны кусæндæтты рацарæзты программæ фидаргонд æрцыд Федерацийы Советы хъæппæрисæй. Ныридæгæн уал æххæстгонд æрцыд программæйы фыццаг хай. Уый фæлгæты 16 уæрæсейаг регионы сарæзтой 40 алыхуызон инфраструктурон бæстыхайы. Уыдоны нымæцы — Цæгат Ирыстон дæр. Амынд программæйы уагæвæрдмæ гæсгæ, нæ республикæйы сарæзтой æнахъомты социалон реабилитацийы центр «Рæдау зæрдæ»-йы ног уæлæмхасæн бæстыхай (ис дзы 49 бынаты).
«Æхсызгон мын у, ацы федералон программæйы Цæгат Ирыстон зæрдиагæй кæй архайдта, уый. Ацы проект ма иу æвдисæн у, бæстæйы закъонæвæрæг оргæнтæ æмæ хицаудзинады регионалон структурæтæ фæлладуагъд æмæ æнæниздзинад фидардæр кæныны инфраструктурæйы нывыладыл æмхъарутæй кæй кусынц, уымæн», — фембæлды фæстæ фæбæрæг кодта Виталий Назаренко.
Æлборты Зæлинæ,
УФ-йы сенаторы
æххуысгæнæг
