Сæрмагонд æфсæддон операцийы архайджытæн æппæтвæрсыг æххуыс чи кæны, уыцы адæмы къордæн саккаг кодтой премитæ. Преми «Путины командæ»-йы лауреаттæн грамотæтæ радта РЦИ-Аланийы Сæргълæууæг Сергей Меняйло.
Лауреатты ‘хсæн — æнæкоммерцион организациты уæнгтæ, бархионтæ, журналисттæ, ахуыргæнджытæ, дохтыртæ æмæ царды архайды иннæ къабæзты минæвæрттæ. Уыцы адæмæй алкæцыдæр зæрдиагæй архайы Уæрæсейы Адæмон фронты хъæппæристы, сæрмагонд æфсæддон операцийы тæлммæ гуманитарон æххуыс æрвитыны куысты.
Уыцы бон Адæмон фронты хæрзиуджытæ райстой: Цæгат Ирыстоны Æхсæнадон палатæйы сæрдар Нинæ Чиплакова, медицинон колледжы директор Реуазты Таймураз, Дзæуджыхъæуы Ирыстойнаг районы цæрджытæн бирæвæрсыг лæггæдты центры директор Дзоблаты Альбинæ, паддзахадон телерадиокомпани «Алани»-йы директор Хъуысаты Тимур, батальонтæ «Шторм.Осетия» æмæ «Алани»-йы æфсæддон уацхæссæг Мамсыраты Георги, Адæмон фронты цæгатирыстойнаг регионалон хайады æмсæрдар Цæгæраты Руслан, Мæздæджы скъола-интернаты директор Иринæ Гречаная æмæ иннæтæ (преми «Путины командæ» æдæппæт саккаг кодтой 15 адæймагæн).
— Ацы бонты кад кæнæм, Фыдыбæстæ хъахъхъæныныл архайдæн йæ цард чи снывонд кодта, уыцы адæмæн. Фæлæ мах стыр аргъ кæнæм, йе ‘рвылбонон хъæппæрисджын куыстæй нæ республикæ æмæ æппæт Уæрæсейы дарддæры райрæзтыл удуæлдайæ чи архайы, уыдонæн дæр. Абон ацы æмбырдмæ чи саккаг кодта, уыцы адæм æгæрон æнувыд сты Фыдыбæстæйыл, — йæ арфæйы ныхасы бафиппайдта Сергей Меняйло.
Адæмон фронты преми «Путины командæ» нысангонд æрцыд, Уæрæсейы фæрныг фидæныл хъæппæрисджынæй чи кусы, уыцы граждæнты хорзæхджын кæнынæн.
РЦИ-Аланийы Сæргълæууæджы æмæ Хицауады пресс-службæ
