Ацы аз цы объекттæ арæзт хъуамæ æрцæуой национ проекттæ æмæ паддзахадон программæты фæлгæты, уыдоны бадзырдтæ бафыссыны фарстатыл æрдзырдтой, РЦИ-Аланийы Хицауады Сæрдар Дзанайты Барис цы кусæг æмбырд сарæзта, уым. Архайдтой дзы министрты кабинеты уæнгтæ æмæ Цæгат Ирыстоны муниципалон скондты разамонджытæ.
Ацы аз æппæт районты дæр национ проекттæ æмæ паддзахадон программæты фæлгæты хъуамæ бындурон цалцæг, реконструкцигонд æмæ арæзт æрцæуа бирæ объекттæ. Бюджетон инфраструктурон æмæ къазнайы сæрмагонд æфстæутты руаджы та саразой алыхуызон мадзæлттæ.
Дзанайты Барисы ныхасмæ гæсгæ, нæ республикæйы Сæргълæууæг Сергей Меняйло фыццаградон нысан сæвæрдта — афойнадыл арæзтадон фæзтæм рацæуын.
— Хъæуы нæ бирæ куыстытæ бакæнын. Кæй снысан кодтам, уыцы объекттæй алчидæр республикæйæн тынг хъæугæ у. Уымæ гæсгæ уал æркæсут, бадзырд арæзт кæмæн нæма ис, уыдонмæ, æмæ сыл куыст фæтагъддæр кæнут. Бадзырдтæ фыст кæм æрцыдысты, уым та подрядон организацитæ хъуамæ арæзтадон фæзтæм рацæуой æмæ куыстытæм бавналой. Æмгъуыдтæ цыбыр сты, — загъта Дзанайты Барис.
Мамиты Лолитæ
