Горæтгæрон районы Сунжæйы хъæуы астæуккаг скъолайы байгом кодтой зæрдылдарæн мемориалон фæйнæг. Мысæн бонмæ æрбацыдысты республикæйы Стыр Ныхасы сæрдар Уататы Зелим, районы администрацийы, æхсæнадон организациты минæвæртты æмæ, сæрмагонд æфсæддон операцийы чи фæмард, уыцы æдзард хæстонты ныййарджытæ æмæ сæ хиуæтты.
Сæрмагонд æфсæддон операцийы архайгæйæ, Ирыстоны хъæбатыртæ стыр лæгдзинад æмæ æхсар кæй æвдисынц, уымæн æвдисæн сты, семæ уæхски-уæхск цы æфсæддонтæ хæцынц: уырыссæгтæ, дагестайнæгтæ, цæцæйнæгтæ æмæ иннæ адæмыхæттытæ. Ирæттæ кæм лæууынц, уым, дам, знаг не ‘рбацæудзæн. Уæвгæ, ирон адæймагæн уый йæ туджы ис. Фыдыбæстæ хъахъхъæнын куы бахъæуа, уæд никуы бафæсвæд кæндзæн йæхи ирон лæг. Кæрæдзийæ æфсæрмы кæнгæйæ, ау, ме ‘мбал хæсты цæхæры куы ис, уæд æз мæхи куыд бамбæхсон, зæгъгæ, сунжæйаг лæппутæ, амæй-ай хæрзконддæр æмæ сæрæндæрæй ацыдысты лæгдзинады фæндагыл. 14 цардбæллон лæппуйы нал æрыздæхтысты сæ райгуырæн хъæубæстæмæ. Нал фендзысты хурыскаст, уалдзæджы рæсугъддзинад. Цалдæрæн дзы сидзæртæй баззадысты сæ хъæбултæ. Иннæтæ та нырма уарзондзинады ад дæр нæма банкъардтой, афтæ æвзонгæй ацыдысты се ‘нусон дунемæ… Нæй адзалы ныхмæ мадзал…
Сунжæйы скъолайы рауагъдонтæ цыппæрдæсæй сæ цард радтой нæ абоны æмæ фидæны фæлтæрты сабыр царды сæрвæлтау.
Зын у, не ‘хсæн чи нал ис, уыдоны тыххæй дзурын. Фæлæ æрыгон, цардæй чи ницыма федта, ахæм удтæ мæлæт куы ссарынц, уæд ноджы зындæр у. Ныййарæджы зæрдæрыстæн ницы хос ис. Уыдонмæ кæсгæйæ, адæм сæ цæссыг нæ урæдтой. Бæргæ сæ фæндыд, истæмæй сын сæ рыст куы фæрогдæр кæниккой… Фæлæ…
Гæджиты Владимиры фырт Георги, йæ амæлæты фæстæ хорзæхджын æрцыд “Лæгдзинад”-ы орденæй;
Алишер Садикжонович Хакимов, йæ амæлæты фæстæ хорзæхджын æрцыд “Сгуыхтдзинад”-ы майданæй;
Бестауты Станиславы фырт Ацæмæз, йæ амæлæты фæстæ хорзæхджын æрцыд Лæгдзинады орденæй;
Багаты Æхсарбеджы фырт Ацæмæз, йæ амæлæты фæстæ хорзæхджын æрцыд “Лæгдзинад”-ы орденæй;
Æлборты Никъалайы фырт Сослан, йæ амæлæты фæстæ хорзæхджын æрцыд “Лæгдзинад”-ы орденæй;
Жажиты Валерийы фырт Аслан, йæ амæлæты фæстæ хорзæхджын æрцыд “Лæгдзинад”-ы орденæй;
Остъаты Оледжы фырт Тамерлан, йæ амæлæты фæстæ хорзæхджын æрцыд “Фыдыбæстæ хъахъхъæнæджы” майданæй;
Кокойты Майрæмы фырт Алан, йæ амæлæты фæстæ хорзæхджын æрцыд “Сгуыхтдзинад”-ы майданæй;
Годжыцаты Герсаны фырт Станислав, йæ амæлæты фæстæ хорзæхджын æрцыд “Ирыстоны Намысæн”-ы майданæй;
Бæззаты Андрейы фырт Руслан, йæ амæлæты фæстæ хорзæхджын æрцыд “Сгуыхтдзинад”-ы майданæй;
Хуыгаты Виталийы фырт Аркади, йæ амæлæты фæстæ хорзæхджын æрцыд “Лæгдзинад”-ы орденæй;
Багаты Эдуарды фырт Ибрагим, йæ амæлæты фæстæ хорзæхджын æрцыд “Лæгдзинад”-ы орденæй;
Тедеты Иваны фырт Альберт, йæ амæлæты фæстæ хорзæхджын æрцыд “Лæгдзинад”-ы орденæй;
Нартыхты Таймуразы фырт Валери, йæ амæлæты фæстæ хорзæхджын æрцыд “Жуковы” майданæй.
Иу минут æдзæмæй алæууыны фæстæ азæлыд Уæрæсейы Федерацийы гимн. Мемориалон фæйнæг байгом кæныны бар лæвæрд æрцыд æдзард хæстонты сывæллæттæн.
Уататы Зелим арфæ ракодта æдзард хæстонты ныййарджытæн æмæ загъта:
— Ацы лæппутæ сæ цард радтой, цæмæй мах æмæ, мæнæ ам цы сабитæ ис, уыдон дзæбæхæй цæрой. Хуыцау нын ахæм хъару радтæд, æмæ сын сæ рухс ном куыд никуы ферох кæнæм. Фæнды мæ арфæ ракæнын сæ ныййарджытæн. Уыдон цытæ бавзæрстой, цас æнæхуыссæг æхсæвтæ арвыстой, уый диссаг у. Стыр бузныг уын уæд, ахæм фæзминаг кæстæртæ кæй схъомыл кодтат.
Нæлгоймагыл, дам, цæссыг нæ фидауы… Сунжæйы фарастазон скъолайы директор Хуыгаты Маркозы фырт Æхсар йæ цæссыг тыххæй ныуурæдта.
— Ацы лæппутæ иууылдæр мæхи раз схъомыл сты. Алкæй тыххæй дæр дзы мæ бон бирæ радзурын у. Кæрæдзийæн уыдысты ныфс, мæлæтæй нæ тарстысты, хæцыдысты хъæбатырæй. Бæрзонд хастой ирон лæджы кад, — загъта Хуыгаты Æхсар.
Мысæн бон бацæттæ кодтой Сунжæйы астæуккаг скъолайы директор Гæбуты Таймуразы чызг Данæ æмæ уырыссаг æвзаг æмæ литературæйы ахуыргæнджытæ Æлборты Лианæ æмæ Джиоты Линæ.
Скъолайы разамынд бузныг зæгъынц Сунжæйы Культурæйы галуаны кусджытæ Гæджиты Алан æмæ Джихаты Рустамæн, 58-æм Æфсады службæгæнæг Жажиты Асланæн.
Гæбуаты Галинæ,
авторы ист къам
