Нæ бæстæйы Президенты æвзæрстыты æртыккаг бон Дзæу-джыхъæуы 26-æм астæуккаг скъолайы фæзы скодтой, Хъырым Уæрæсейы скондмæ фæстæмæ æрбаиуы историон цауы 10 азы бæрæгбон æмæ цæрвкъахæнты къуыри афæндараст кæныны ма-дзæлттæ.
Дзæуджыхъæуы администрацийы культурæйы управленийы хицау Мæрзойты Руслан куыд ра-дзырдта, афтæмæй бæрæгбоны мадзæлттæ арæзт цыдысты сахары æппæт æвзарæн хæйтты дæр.
– Цæрвкъахæнты къуыри æрвитæм æмæ цин кæнæм «Хъырымаг уалдзæг»-ыл. Дæс азы размæ нæ бæс-тæйы æрцыд стыр цау: Хъырым æрбаздæхт «нæхимæ». Уыцы историон боны кадæн цæрвкъахæнты бæрæгбон бабастам хъырымаг æгъдæуттимæ, æмæ базарадон-экономикон техникумы студенттæ æрцæттæ кодтой Хъырымы традицион дзидзаджын гуылтæ зетийы сойы фыхæй, хæнкъæл æмæ цай. Кæй зæгъын æй хъæуы, сæйрагдæр нæ бæрæгбоны уырыссаг лауызтæ, царв æмæ мыд сты. Нæ мадзалы архайджытæ æмæ æвзарæн хайады хъæлæсгæнджытæн фадат уыдзæн нæ хойрагæй саходынæн, сывæллæтты аивадмæ бакæсынæн, – загъта Мæрзойы-фырт.
Сахары уæлæмхасæн ахуырады хъомылгæнинæгтæ сæ аивад æвдыстой фæндырдзагъд, зарджытæ æмæ кафтæй.
Нæ уацхæссæг
