Æмархайд – ахуырадон æмæ зонадон къабæзты

0
21

Цæгат Ирыстоны Сæргълæууæг Сергей Меняйлойæн кусæг фембæлд уыд Национ иртасæн университет – Экономикæйы уæлдæр скъолайы ректор Никитæ АНИСИМОВИМÆ. Фембæлды архайджытæ се ’ргом аздæхтой ахуырад æмæ наукæйы къабæзты иумæйаг проекттæ царды рауадзыны фарстатæм.

Ныхасы архайæг уыдысты РЦИ-Аланийы ахуырад æмæ наукæйы министр Алыбегты Эллæ æмæ Цæгат Ирыстоны Хетæгкаты Къостайы номыл паддзахадон университеты ректор Огъуаты Алан дæр.
ЦИПУ æмæ Экономикæйы уæлдæр скъолайы разамонджытæ куыд радзырдтой, афтæмæй бон раздæр бафыстой ахуырадон æмæ наукон æмархайды бадзырд. Уыцы документы бындурыл цæттæгонд цæудзысты уæлдæр профессион ахуырады, наукон-педагогон кусджыты дæсныйад бæрзонддæр кæныны, студенттæн æмæ аспиранттæн стажировкæтæ аразыны иумæйаг программæтæ. Уымæй уæлдай, дыууæ уæлдæр ахуыргæнæндоны специалисттæ бакусдзысты социологийы, археологийы, хурыскæсæниртасынады, дизайны, æрхъуыдыгонд интеллект æмæ æндæр къабæзты технологон проекттыл.
Уыцы нысантыл Сергей Меняйло æмæ Никитæ Анисимов бæстон æр-
дзырдтой.
– Бæстæйы раззагдæр уæлдæр ахуыргæнæндæттæй иуимæ æмгуыстад уæлæмхасæн фадæттæ ратдзæн, цæмæй Цæгат Ирыстоны уæлдæр профессион ахуырады сис-
темæ хъомысджындæр кæна. ЦИПУ æмæ Экономикæйы уæлдæр скъолайы ’хсæн цы æмгуыстад рапарахат, уый фæрцы не студенттæ æмæ ахуыргæнджытæ зынгæ бафтаудзысты сæ зонындзинæдтæ æмæ фæлтæрддзинадыл. Æхсызгон мын у, республикæйы уæлдæр ахуыргæнæндæттæ дæсны æмæ адæмон хæдзарады алы къабæзты хъæугæ специалисттæ цæттæ кæныны хъуыдда-
джы нырыккон технологитæ æмæ раззагдæр ахуырадон программæтæм æмхиц кæй сты, уый. Уыцы æууæлы фæрцы не ’рыгон специалисттæ æнæмæнгхъæугæ уыдзысты уæрæсейаг экономикæйы бирæ къабæзты, – йæ раныхасы бафиппайдта Сергей
Меняйло.
Уыцы хъуыдытимæ æмзæрдæ уыд Никитæ Анисимов дæр. Йæ ныхасмæ гæсгæ, ЦИПУ æмæ Экономикæйы уæлдæр скъолайы уæрæх æмархайдæн хорз гæнæнтæ ис. «Уыцы фадæттæй спайда кæнгæйæ, иумæйаг хъарутæй бакусдзыстæм Цæгат Ирыстоны уæлдæр профессион ахуырады системæйы дарддæры нывыладыл», – загъта Никитæ Анисимов.

Сланты Аслан

ОСТАВЬТЕ ОТВЕТ

Please enter your comment!
Please enter your name here