Дзæуджыхъæуы æфсæддон комиссарады ацыд уалдзыгон æрсидт æфсæддон службæмæ.
Æнхъæлмæ сæм кæсы дард фæндаг. Æрбацыдысты æмæ сиддонтæн сæ арфæйы ныхæстæ загътой уазджытæ, Дзæуджыхъæуы бынæттон хиуынаффæйады администрацийы сæрдары хæдивæг Маматы Хъазыбег, «Иры Стыр Ныхас»-ы Промышленон районы хайады сæрдар Дыгъуызты Алыксандр, Республикæ Цæгат Ирыстон-Аланийы десантон цæдисы сæрдар Золойты Игорь, Уæрæсейы Федерацийы регионалон хайады æфсæддонты мадæлты цæдисы сæрдар Моурауты Зæлинæ, Дзæуджыхъæуы хъазахъхъаг æхсæнады атаман Александр Григорьев æмæ иннæтæ.
– Алы хатт дæр абоны хуызæн æрæмбырд вæййæм, цæмæй сиддонты афæндараст кæнæм. Медицинон къамис ацæугæйæ æмæ ветерантимæ фембæлдтыты фæрцы уыдон сæхицæн равзарынц зæрдæмæдзæугæ æфсæддон хæйттæ, кæй зæгъын æй хъæуы, ам ахсджиаг у æнæниздзинад. Мах фæнды, цæмæй нæ республикæйы цы традицитæ ис, уыдон ма фесæфой. Æфсæддон хæс куыд æххæст кæной, нæ республикæйы ном сæрыстырæй куыд хæссой, семæ уый тыххæй фæдзурынц, – загъта Золойты Игорь.
Дзæуджыхъæуæй дзы уыд 8 сиддоны, районты минæвæрттимæ та бауыдзысты 70-мæ хæстæг.
– Ахуыр кодтон С.Ю.Виттейы номыл Рязаны Мæскуыйаг университеты филиалы, юридикон факультеты. Фæнды мæ дарддæр мæ цард сбæттын пъæлицæйы куыстимæ. Уый тыххæй, æнæмæнг, хъæуы хæстон билет. Цыфæнды æфсæддон хаймæ дæр разы дæн ацæуынмæ, ууыл нæ тыхсын, дзæбæх службæ кæндзынæн, цæмæй мæ фæнд сæххæст уа, – загъта сиддон
Æрсойты Радион.
Уый фæстæ сæ аластой республикæйы æфсæддон комиссарадмæ, æмбырдгæнæн пунктмæ. Уым сæмбырд кодтой нæ рес-
публикæйы алы районты сиддонты. Иу хатт ма уым ацæудзысты медицинон къамис, фысдзысты психологон тесттæ, сæ психологон цæттæдзинад сын сбæрæг кæндзысты, уый фæрцы бæлвырд уыдзæн, кæдæм æрвыст æрцæудзысты, уый.
Кадджын уавæры сæ афæндараст кæндзысты ацы къуырийы кæрон
республикæйы æфсæддон комиссарадæй.
Æрвыст æрцæудзысты алы горæттæм: Тулæ, Псков, Иваново, Стъарапол, Мæскуыйы бынмæ æмæ Дард Хурыскæсæнмæ.
Цæгæраты Эльмирæ
