Турчы цæрæг ирæтты æхсæнад «Алан»-ы минæвæрттæ ныр цалдæр боны уазæгуаты сты Цæгат Ирыстоны. Сæ фыдæлтæ Туркмæ афтыдысты XIX æнусы, фæлæ уæддæр сæ къухы бафтыд ирон æгъдау æмæ мадæлон æвзаг бахъахъхъæнын. Нæ сивтой сæ зæрдæтæ сæ фыдæлты райгуырæн зæххыл. РЦИ-Аланийы Гуманитарон æмæ социалон иртасæнты институты уыдон фембæлдысты, ирон æвзаг æмæ нæ фыдæлты æгъдæуттæ бахъахъхъæныныл зæрдиагæй чи архайы, уыдонимæ.
– Хъыгагæн, не ’взаг, нæ культурæ, нæ истори, нæ ирон æгъдау фыддæрæй-фыддæрмæ цæуынц, æмæ не ’ппæт дæр уыцы
хъуыддагыл тыхсæм. Фæлæ, Хуыцауæй бузныг, табу Хуыцауæн, ис ма нæм ахæм адæм, йе ’взаг æмæ йæ культурæйыл, йе ’гъдæуттыл йæ дзыппæй раздæр чи мæт кæны. Гъемæ мах, Турчы цæрæг ирæтты æхсæнад «Алан», сбæрæг кодтам уыцы адæмы, æмæ сын нæ зæрды ис раарфæ кæнын. Нæ сæртæй сын ныллæг кувæм. Уыдон нæ истори, культурæ æмæ æгъдæуттæ хъахъхъæнынц æмæ сын сцæттæ кодтам сæрмагонд майдантæ, – загъта Турчы цæрæг ирæтты æхсæнад «Алан»-ы сæрдар Хъуысаты Садреттин.
Кадджын хæрзиуæгæй хорзæхгонд æрцыдысты нæ республикæйы раздæры Сæргълæууæг Битарты Вячеслав, УФ-йы культурæйы сгуыхт кусæг, продюссер æмæ режиссер, «Нарт-Арт студи»-йы директор Туаты Теминæ, газет «Рæстдзинад»-ы сæйраг редактор Фидараты Юрий, литературон-аивадон æмæ æхсæнадон-политикон журнал «Мах дуг»-ы сæйраг редактор Хетæгкаты Оксанæ, газет «Дигорæ»-йы сæйраг редактор Сакъиты Эльбрус, нывгæнæг-модельер, чындздзон æмæ национ дарæсы зындгонд хуыйæг Годжыцаты Изольдæ, уæрæсейаг историк-кавказиртасæг æмæ æхсæнадон архайæг, историон наукæты доктор, профессор Бзарты Руслан, Цæгат Ирыстоны Тæбæхсæуты Балойы номыл паддзахадон театры аивадон разамонæг Уалыты Гиви, РЦИ-Аланийы паддзахадон ансамбль «Алан», Цæгат Ирыстоны базарадон-экономикон колледжы директор Æбиты Валери, РЦИ-Аланийы Гуманитарон æмæ социалон иртасæнты институты директор Хъаныхъуаты Зæлинæ æмæ иннæтæ.
Ирыстонимæ бастдзинад кæй нæ сафынц, сæ хистæрты æгъдæуттыл сæ зæрдæтæ кæй нæ сивтой, ирон ныхасы фидæныл кæй тыхсынц, уый нын ныфс дæтты, иумæ нæ ирондзинад, не ’гъдæуттæ, нæ мадæлон æвзаг æмæ нæ фыдæлты фарн кæй бахъахъхъæндзыстæм, уымæн.
Гæбуаты Галинæ
