Уæрæсейы фыццаг къорды чемпионаты командæтæ 8 æмæ 12 майы акодтой фæйнæ дыууæ хъазты.
8 майы командæты фембæлдтытæ уыдысты, амæй размæ фæстæдæрмæ кæй рахастой, уыцы 24-æм туры хъæзтытæ.
Дзæуджыхъæуы ФК «Алани»-йы ныхмæлæууæг уыцы фембæлды уыд мæскуыйаг командæ «Родина». Фембæлд цыди Грознайы стадион «Ахмат-Арена»-йы æмæ дзы «Алани» нымад уыд фысымыл.
Хъазты фыццаг æмбисы алайнæгтæн 26-æм минутыл бантыст хыгъд байгом кæнын. «Родина»-йы дуары пурти бакъуырдта Ислам Машуков. Уый фæстæ дæр ма фысымтæ сарæзтой къорд ныббырсты, фæлæ хыгъд фæфылдæр кæнын сæ къухы нал бафтыд. Уый нæ, фæлæ ма, тæрхонгæнæг фыццаг таймы кæронмæ цы рæстæг бафтыдта уæлæмхасæн, уым уазджыты хъахъхъæнæг Артем Сокал хыгъд скодта 1:1.
Дыккаг таймы алайнæгтæ размæ куы атындзыдтой, уæд та 53-æм минутыл уазджытæ цырд ныббырст ацарæзтой, æмæ сæ æрдæгхъахъхъæнæг Астемир Гордюшенко пурти Ростислав Солдатенкойы фæрсты «Алани»-йы дуары фæмидæг кодта, æмæ хыгъд ссис 1:2 – «Родина»-йы пайдайæн.
Бæргæ ма архайдтой дзæуджыхъæуккæгтæ хъазты цыд сæхи пайдайæн рацаразыныл, фæлæ уазджытæ къæрцхъусæй фæлæууыдысты, æмæ фембæлд ахицæн 1:2 хыгъдæй.
Ацы хæрды фæстæ «Алани» æрхауд 9-æм бынатмæ. Уымæй цыппар боны фæстæдæр, 12 майы ФК «Алани» уазæгуаты фембæлд Мæскуыйы «Торпедо»-имæ.
Хъазтæн райдианæй кæронмæ пурти фылдæр уыди алайнæгтæм, дыууæ командæйы хъазджытæ дæр фылдæр уыдысты «Торпедо»-йы ’рдыгæй хъазæн фæзы æмбисы. Бæргæ агуырдтой «Алани»-йы хъазджытæ фæндæгтæ фысымты дуармæ баирвæзынмæ, фæлæ сын цыма исчи кæлæнтæ скодта, афтæ, суанг хъазты кæронмæ дæр сæ къухы нæ бафтыд фысымты иварон фæзы тæссаг уавæртæ саразын.
Хъазт ахицæн 0:0 хыгъдæй, æмæ «Алани» ныр 43 очкоимæ ахсы 8-æм бынат. Чи æнхъæл уыди нæ командæйы иузæрдион фарсхæцджытæй, æмæ 1-аг бынатмæ тырнæг «Алани» афтæ ныллæг бынатмæ æрхаудзæн? Иу ныхасæй, ацы азы чемпионаты кæрон нæ футболуарзджытæн æрхаста æнкъарддзинад, фæлæ уæддæр нæ ныфс хъуамæ ма асæтта. Хъуыды кæнын хъæуы фидæныл. Нæ хъазджыты азымджын кæнынмæ æвзаг дæр нæ тасы. Уыдон, сæхиуыл нæ ауæрдгæйæ, бæргæ фæархайынц сæ иузæрдион футболуарзджыты зæрдæтæ барухс кæныныл, фæлæ цæмæндæр раздæры хуызæн нал рæстмæ кæны сæ архайд. Уый аххосæгтæ чи зоны, уыдонæй аразгæ уыдзæн нæ командæйы хъысмæт. «Алани»-йы фарсхæцджытæ, Хуыцауæй ратгæ хорздзинадау, æнхъæлмæ кæсынц нæ стадионы сцæттæмæ. Уый, æнæмæнг, фæахъаз уыдзæн нæ командæйы хъазджыты ног бæрзæндтæм тырнынмæ сразæнгард кæнынæн.
Чемпионаты 32-æм туры хъæзтытæ ахицæн сты ахæм хыгъдтимæ:
«Арсенал» (Тулæ) – «Нефтехимик» – 1:0, «Енисей» – ПФК «Кубань» – 2:0, «Шинник» – «СКА-Хабаровск» – 2:1, «Сокол» (Саратов) – «Тюмень» – 2:1, «Торпедо» (Мæскуы) – «Алани» – 0:0, «Ленинградец»-«Химки» – 1:3, «КамАЗ» – «Родина» – 1:3, «Акрон» – «Динамо» (Махачка-
ла) – 3:1, «Волгарь» – «Черноморец» – 1:1.
Баскаты Уырызмæг
