Ирон æвзаг æмæ литературæйы бонмæ республикæйы цы бирæ цымыдисаг æмæ дзыллон мадзæлттæ арæзт æрцæуы, уыдонæй иу у конкурс «Иры фидæн». Абон райдайдзæн уыцы ахуырадон ерысы республикон къæпхæн.
Уый тыххæй фехъусын кодта РЦИ-Аланийы Ахуырад æмæ наукæйы министрады пресс-службæ.
Министрады минæвары ныхасмæ гæсгæ, конкурсы сæйрагдæр нысан у рæзгæ фæлтæры разæнгард кæнын мадæлон æвзаг хуыздæр зонынмæ, нæ адæмы фыдæлтыккон хæзнаты хъомыс зæрдæйæ æнкъарынмæ… Йæ архайджытæ та сты скъолайы агъоммæ ахуырады кусæндæтты хъомылгæнинæгтæ.
Ныридæгæн уал муниципалитетты арæзт æрцыдысты конкурсы æвзарæн ерыстæ. Ныр та муниципалитетты æнтыстджындæр минæвæрттæ сæ арæхстдзинад æвдисдзысты республикон æмвæзадыл. Афтæ, Алагиры, Æрыдоны, Æрæфы, Дыгуры, Кировы æмæ Мæздæджы районты минæвæрттæ абон æрбамбырд уыдзысты Æрыдонмæ, Культурæйы галуанмæ. 16 майы та ахæм ерысты архайæг суыдзысты Дзæуджыхъæуы, стæй Горæтгæрон æмæ Рахизфарсы районты минæвæрттæ (фембæлд уыдзæн Алайнаг гимназы бæстыхайы).
Конкурс «Иры фидæн»-ы уæлахиздзаутæ сбæрæг уыдзысты фæстæдæр республикон кæронбæттæны.
Нæ уацхæссæг
