Цæгат Ирыстоны паддзахадон университеты ахуыргæндтæ æрбацыдысты Мæскуымæ æмæ ам къуырийы дæргъы, Цæгат Ирыстоны бонты фæткмæ гæсгæ, национ иртасæн центр «И.В.Курчатовы номыл институт»-ы кæсдзысты лекцитæ.
Дзыллон мадзæлтты программæмæ хауынц наукон, наукон-популярон æмæ культурон хайæдтæ. Наукон хайадмæ гæсгæ, лекцитæ ацæудзысты археологи, биотехнологи, æнæниздзинад хъахъхъæнынад, инженерон технологитæ, психологон иртæстытæ æмæ химийæ. Докладтæ скæндзысты канд амынд университеты нæ, фæлæ Цæгат Кавказы Хæххон-металлургон институты, бæстæйы Наукæты академийы Дзæуджыхъæуы наукон центры биомедицинон иртæстыты институты, хæххон паддзахадон аграрон университеты æмæ Элект-ронон æрмæджыты наукон-иртасæн институты ахуыргæндтæ.
Наукон-популярон хайад арæзт у скъоладзаутæн. Зæгъæм, фæсивæдæн уыдзæн Цæгат Ирыстоны æрдзимæ хуыздæр базонгæ уæвыны, стæй, хойраджы хæрзхъæддзинад сбæлвырд кæныны фæдыл экспресс-мадзæлтты фæлварæнтæ куыд цæуынц, уый базоныны фадат.
Программæйы культурон хайадмæ хауынц ЦИПУ-йы нывкæнынады аивады кафедрæйы нывгæнджытæ-ахуыргæнджыты равдыст «Притяжение небес», Гасситы Михалы ист къамты равдыст «Первозданная Алания», Адæмты Хæлардзинады орденæй хорзæхджын, кафты паддзахадон академион ансамбль «Алан»-ы, Ногдзауты галуаны адæмон кафты ансамбль «Чысыл джигит»-ы артистты, стæй Мæскуыйы Стыр театры солист Дулаты Дзамболат æмæ Уæрæсейы сгуыхт артист Цæрикъаты Феликсы æвдыст кадджын концерт.
Дыууæ боны дæргъы цæудзысты хъæдæрмæгæй дзаумæттæ аразыны, ирон сæрбæттæнтæ бийыны æмæ нымæт уафыны фæдыл мастер-кълæстæ. Уымæй уæлдай, равдисдзысты Колыты Анатолийы ист киноныв «Авд сау гæххæтты», Хетæгкаты Къостайы поэмæ «Фатимæ»-мæ гæсгæ ист киноныв, стæй Рафаэль Гаспарянцы историон драмæ «Легенда горы Тбау».
Национ иртасæн центр «И.В. Курчатовы номыл институт»-ы цæуæг Цæгат Ирыстон-Аланийы бонтæ нымад сты фарон майы нæ республикæйы æмæ амынд центры æхсæн фидаргонд æмгуыстады тыххæй бадзырды амынд дзыллон мадзæлттæй иуыл.
Курчатовы номыл институт æмæ Цæгат Ирыстон æххæст кæнынц къорд иумæйаг ахуырадон проекты. Зæгъæм, ацы аз апрелы ЦИПУ-йы ацыд Курчатовы ахуырадон форум. Фарон июны нæ республикæйы фыццаг хатт баххæст кодтой проект «Коды Курчатова»-йы тематикон рад, ацы аз та Цæгат Ирыстоны баххæст кæндзысты дыууæ амынд рады.
Фарон регионы 4 скъолайы байгом кодтой Курчатовы кълæстæ. Ацы скъолатæн радтой физикæйы кълæс-тæн хъæугæ лабораторон ифтонггæрзтæ. Проекты архайæг педагогтæн амоны дæсныдзинады къæпхæн фæуæлдæр кæныны фæдыл курсытæ, ЦИПУ-йы студенттæ æмæ аспиранттæ та Курчатовы номыл институты лабораториты ацæуынц практикон ахуырад.
Цæгат Ирыстоны паддзахадон университеты пресс-службæ
