Цæгат Ирыстоны Хетæгкаты Къостайы номыл паддзахадон университеты наукон библиотекæйы æмбырдтæ аразæн залы йæ куыст райдыдта семинар «Роль органов местного самоуправления в работе по выявлению, предотвращению и урегулированию конфликтных ситуаций на межнациональной и межрелигиозной основе»-йы темæйыл.
Семинар арæзт цæуы нæ республикæйы дзыллон хабархæссæг фæрæзтæ, барадхъахъхъæнæг, паддзахадон æмæ муниципалон оргæнты кусджытæн сæрмагонд ахуыртæ саразыны фæдыл. Адæмы зондахастмæ экстремизмы фæзындтытæ цæмæй ма хæццæ кæной, уый ныхмæ ахъаззаджы мадзæлттæ, алы адæмыхæттытæ æмæ динты ‘хсæн нывыл æмæ æфсымæрон ахастдзинæдтæ рæзын кæныны фарстатыл æмæ терроризмы идеологийæ хи бахизыны хъуыддæгтыл архайыныл рауад ныхас.
Семинар бацæттæ кодтой Цæгат Ирыстоны Хетæгкаты Къостайы номыл университет æмæ РЦИ-Аланийы Национ политикæ æмæ æддагон бастдзинæдты министрад. Мадзалы фыццаг боны æнтыстджын куысты тыххæй архайджытæн арфæтæ ракодтой: ЦИПУ-йы наукон фарстаты фæдыл проректор Тенгиз Тиникашвили, РЦИ-Аланийы национ политикæ æмæ æддагон бастдзинæдты министр Бæгъиаты Алан, Пятигорскы паддзахадон университеты профессор, политикон наукæты доктор Майя Аствацатурова, Махачкалайы нацитæ æмæ конфесситы ‘хсæн быцæутæй развæлгъау бахизыны граждайнаг ахастыты Координацион центры разамонæг Магомед Магомедов, Стъараполы Координацион советы разамонæг Аннæ Багдасарова æмæ аналитикон куысты экспертон хайады разамонæг Александр Саенко.
Семинары программæмæ хаст æрцыд лекцитæ æмæ практикон ахуыртæ.
Бæгъиаты Алан радзырдта терроризмы ныхмæ нæ республикæйы бæлвырд æмæ биноныг архайд кæй цæуы. Рæзгæ фæлтæры зондахаст фыдбылызхæссæг идеологийæ бахизыны хъуыддаджы фæсивæд æмæ æнахъомтимæ арæх фембæлдтытæ кæй аразынц æмæ сын кæй æмбарын кæнынц, царды рæдыд фæндагæй хи бахизæн куыд ис, уый.
– Терроризмы тæваг кæдæм хæццæ кæна, уым туг, мæлæт æмæ фыдбылызæй уæлдай ницы ис. Нæ республикæ дæр ын бавзæрста йæ сау тыхтæ. Æмæ абон æнæхъæн дунейы сабырдзинадуарзаг адæм æмдых-æмзондæй архайынц уыцы идеологийы уидæгтæ бындзарæй сыскъуыныныл. Канд рæзгæ фæлтæр нæ, фæлæ æхсæнадон царды æппæт къабæзты дæр терроризмы ныхмæ профилактикæ æмæ пропагандæйы
куыст ахъаззаг у. Æмбарын кæнæм, амонæм терроры фæзындтыты миниуджытæ цавæр вæййынц æмæ сæ рагацау куыд раиртасын хъæуы, уый. Æрмæстдæр къæрцхъус уæвын æмæ зонындзинæдты фæрцы нæ къухы бафтдзæн æнтыстджын архайд терроризмы ныхмæ, – загъта министр.
Саутæты Тамилæ
