Цæгат Ирыстоны Сæргълæууæг Сергей Меняйло йæ телеграм-каналы куыд фехъусын кодта, афтæмæй афæдзы кæронмæ республикæйы хъæууон скъолаты байгом уыдзысты 13 «Рæзты тæлм»-ы.
Ныридæгæн регионы кусынц уæлæмхасæн ахуырады амынд 125 центры. «Рæзты тæлм»-ыты фæрцы сывæллæттæ базонгæ вæййынц робототехникæ æмæ æнæпилот тæхæн аппараттимæ, цæттæ кæнынц мультипликацион кинонывтæ, стæй скъолайы ахуырадон предметтæ биноныг раиртасынц.
«Нæ Ахуырад æмæ наукæйы министрад æххæст кæны национ проект «Ахуырад»-мæ хауæг федералон программæ «Нырыккон скъола». Стыр æргом инженерон-техникон программæтæм кæй здахæм, уый фæрцы хорзæрдæм ивддзинæдтæ ’рцыд. Зæгъæм, ацы аз физикæйæ Иумæйаг паддзахадон фæлварæн чи дæтты, скъолатæ каст фæуæвæг уыцы адæмы нымæц дыууæ хатты фæфылдæр. Хорзæрдæм ивддзинæдтæ æрцыд ахуырадон предметтæ информатикæ æмæ химийы дæр. «Рæзты тæлм»-ытæ кæм гом кæнæм, уыцы фæсивæды дзæвгар хай каст фесты ахæм хъæууон скъолатæ. Ахуырады техникон къабæзтæн стыр ахадындзинад кæй ис, фæсивæд уый хатынц, мах та нæ кæстæртæн нырыккон удæнцой уавæртæ дарддæр араздзыстæм, сæ курдиат раргом кæныны фадат сын куыд уа, афтæ», – бафиппайдта регионы разамонæг.
(«ИрИнформ»)
