Дзæуджыхъæуы скъолаты чи байгом, уыцы сæрдыгон лагертæ сæ хъомылгæнинæгтæн бацæттæ кодтой мидисджын ирхæфсæн программæ.
Фæсивæдмæ конкурстæ æмæ экскурситæ, стæй, чи цæмæ арæхсы, уымæ гæсгæ арæзт къордты куыст æнхъæлмæ кæсынц. Горæты администраци уæлдай фылдæр æргом здахы сæрдыгон лагерты хойраджы фарстамæ. Ахуыры азы заман куыд уыд, афтæ ныр дæр Дзæуджыхъæуы хойраджы комбинат скъолатæ ифтонг кæны цæттæ хæринагæй.
— Нæ комбинат скъолатимæ дарддæр бастдзинад дары. Кæй хæрзаддзинад раиртæстам, хойраджы уыцы ног хуызтæ сæрдыгон лагерты хæринæгты номхыгъдтæм бахастам. Хæринаг цæттæ кæнгæйæ, пайда кæнæм дзидзайæ, халсартæ, æхсыр æмæ æндæр хойрагæй. Абон бацæттæ кодтам къæдорцыхтæй хæрзад хæринаг, — зæгъы комбинаты технолог Хетæгкаты Зæлинæ.
Июны æмæ июлы сæрдыгон лагертæм æрбацæуæг сывæллæттæ дзы сæ фæллад уадздзысты дыууæ радæй фæйнæ 18 боны дæргъы. Царды зын уавæры чи бахауд, уæлæмхасæн социалон æххуысхъуаг чи у æмæ æнахъомты хъуыддæгты фæдыл къамисты номхыгъдтæм кæй бахастой, сæрдыгон лагертæм, фыццаджыдæр, исынц ахæм сывæллæтты.
ЦÆГÆРАТЫ Жаннæ
