Кæмæ цы хъысмæт кæсы, уый ничи зоны. Хатгай афтæ рауайы æмæ кæддæры сæрæн, цæрдæг, æнæзивæг адæймаг йæ кары куы бацæуы, уæд иунæгæй аззайы хæдзары дзаг бинонтæй, вæййы фæкæсынхъуаг. Æмæ уæд йæ фарсмæ æрбалæууы паддзахадон социалон службæйы кусæг.
Комсомольскы хъæуы æвæгæсæг адæмæн ныр 32 азы бæрц лæггад кæны Мæргъиты-Габоты Уарзетæ.
Советон Цæдисы рæстæг Кировы районы колхоз «Комсомолец» нымад уыд раззагдæртимæ. Уарзетæ куыста æхсыры-товарон фермæйы хæринаггæнæгæй, фосдарджытæ йæ конд дзул бирæ уарзтой. Рацарæзты азтæ ралæууыдысты, колхозты куыст бамынæг, æмæ бирæ адæм æгуыстæй баззадысты.
Мæргъиты хæдзары хъомыл кодта цыппар сывæллоны æмæ Уарзетæ куысты ныллæууыд социалон службæйы. Æрмæстдæр фæлмæнзæрдæ, искæй зыныл чи батыхсдзæн æмæ æххуысмæ цæттæ чи у, ахæм адæймаг бакусдзæн ацы къабазы. «Бузныг, Уарзетæ», — цал æмæ цал хатты фехъуыста ацы ныхæстæ йæ хъæуккæгтæй.
Болататы Дусяйыл 93 азы цæуы. Йæ ныхасмæ гæсгæ, йæ цардыл азтæ бафтыд Уарзетæйы фæрцы.
— Цафонфæнды дæр æм бадзур — уайтагъд дæ цуры алæудзæнис. Мæ хæринаг, мæ хостæ, хæ-
дзары сыгъдæгдзинад — алцæмæ кæсы лæмбынæг, — зæгъы Дуся.
— Бирæ лæггад зонын Уарзетæйæ, — у мæ цæстуарзон ныхасæмбал, фæлтæрдджын у йæ куысты, алцæмæдæр хорз арæхсы. Аласы нæ амбулаторимæ, дуканимæ, — зæгъы 83-аздзыд Чсиаты Верæ.
Ласгæ та сæ акæны мотоциклыл. Дыууæ азы размæ йæ æртæцалхджын æфсæн бæх куы балхæдта, уæдæй фæстæмæ иумæ лæггад кæнынц адæмæн. Кусгæ та йын кæны электрон тыхы фæрцы.
— Мотоциклы æххуысæй, мæ бæрны цы адæм ис, уыдонæн æнæзивæгæй ласын дзул, хойраджы продукттæ, дохтыры рафыст хостæ, хъæуы уынгты дæр атезгъо кæнæм. Ме ‘мкусæг Мерденты Риммæимæ не ‘рбацыдмæ фенхъæлмæ кæсынц, иу бинонтау кæрæдзиуыл сахуыр стæм, — зæгъы Уарзетæ.
Социалон кусджыты фарсмæ алы хъуыддаджы дæр балæууы Комсомольскы хъæуы администрацийы сæргълæууæг Аулохты Валери. Алывæрсыг æххуыс сын кæны Кировы районы адæмæн социалон лæггæдты комплексон центры директор Чеджемты Рузаннæ.
Ацы бон социалон кусджытæ бæрæг кæндзысты сæ профессионалон бæрæгбон. Зæрдæрухс уæнт сæ цард æмæ сæ куыстæй.
ГУГКАТЫ Жаннæ
