Цæгат Ирыстон Бетъырбухы дунеон экономикон форумы

0
32

Ацы бонты йæ куыст дарддæр кæны Бетъырбухы дунеон экономикон форум. Зындгонд куыд у, афтæмæй дунеон равдысты архайы Республикæ Цæгат Ирыстон-Аланийы официалон делегаци регионы Сæргълæууæг Сергей МЕНЯЙЛОЙЫ разамындæй. Форумы куысты фыццаг дыууæ боны нæ республикæйы минæвæрттæн уыд цалдæр ахсджиаг фембæлды егъау федералон компаниты, Уæрæсейы регионты, стæй фæсарæйнаг бæстæты минæвæрттимæ.
Амæй размæ куыд уыд, афтæ та ныр дæр Цæгат Ирыстон форумы байгом кодта йæ сæрмагонд экспозици. Республикæйы стендты равæрдтой ахадгæ 29 инвестицион проекты тыххæй æрмæджытæ. Сæ иумæйаг аргъ 97 миллиард сомы бæрц цы проекттæн у, уыдоны фæрцы хæстæгдæр азты республикæйы хъуамæ фæзына 8 минæй фылдæр ног кусæн бынаты. Ныр уыцы проектты авналæнтимæ зонгæ кæнынц цæгатирыстойнаг экспозицийы уазджытæ.
Уыцы иу рæстæг делегацийы уæнгтæн бацайдагъ сты хъуыддаджы фембæлдтытæ форумы иннæ архайджытимæ.
Зæгъæм, форумы фыццаг бон Сергей Меняйлойæн фембæлд уыд акционерон æхсæнад «КАМАЗ»-ы генералон директоры хæдивæг Андрей Чурсинимæ. Фембæлды архайджытæ се ‘ргом аздæхтой Цæгат Ирыстоны транспортон инфраструктурæйы куыст фæнывылдæр кæныны фарстамæ. Зындгонд куыд у, афтæмæй ныртæккæ республикæйы æхсæнадон транспорты сис-темæйы куыстмæ хаст цæуынц зынгæ ивддзинæдтæ. Биноныг архайд цæуы ног бæлццæттæласæн транспорт æлхæныныл дæр. Уыимæ, хæстæгдæр рæстæг самал кæнын хъæудзæн астæуккаг къласы 270 автобусы бæрц. Уыцы æууæл хынцгæйæ, Андрей Чурсин зæрдæ бавæрдта, «КАМАЗ» ахæм автобустæй республикæ сифтонг кæнынмæ цæттæ кæй у, уымæй.
Ахуырады, наукæ æмæ регионы социалон-экономикон райрæзты иумæйаг проекттæ æххæст кæныныл та бæстон ныхас рауад, Сергей Меняйлойæн Экономикæйы уæлдæр скъолайы ректор Никитæ Анисимовимæ цы фембæлд уыд, уым.
Сергей Меняйло куыд фæбæрæг кодта, афтæмæй республикæ æмæ ацы уæлдæр ахуыргæнæндонæн ныридæгæн хорз бастдзинæдтæ ис. Ныр та фидаргонд цæуы уæрæх æмгуыстады фæдыл бадзырд. «Ныфс мæ ис, уыцы æмархайд Цæгат Ирыстоны социалон-экономикон райрæзтыл хорзæрдæм кæй фæзындзæн, уымæй», — документы йæ къух бавæргæйæ, загъта Сергей Меняйло.
Цæгат Ирыстоны Сæргълæууæгæн фембæлдытæ уыд Пысылмон Республикæ Ираны Базарадон-промышленнон палатæйы президент Мехди Азадвариимæ, компани «AURUS AQVA»-йы генералон директор Михаил Козловимæ, Ленинграды облæсты губернатор Александр Дрозденко æмæ иннæ делегациты минæвæрттимæ. Уыцы фембæлдтыты дæр бæстон ныхас рауад æмархайды фарстатыл. Афтæ, æппæтвæрсыг æмгуыстады фæдыл бадзырд фидаргонд æрцыд Ленинграды облæстимæ. «Абон цы бадзырд сфидар кодтам, уый бындурыл Цæгат Ирыстон æмæ Ленинграды облæст уæрæх æмархайд рапарахат кæндзысты экономикæ æмæ базарады, æнæниздзинадхъахъхъæнынад æмæ дзыллон спорты, культурæ æмæ наукæйы, фæсивæдон политикæ æмæ иннæ къабæзты. Уыимæ, Ленинграды облæсты минæвæрттимæ ныридæгæн сбæлвырд кодтам, фыццаг къæпхæныл цы иумæйаг проекттæ æххæст кæнынмæ бавналдзыстæм, уыдоны рагагъоммæ номхыгъд», — фембæлды фæстæ ра-дзырдта Цæгат Ирыстоны разамонæг.
Форумы зноны программæйы сæйрагдæр уыд пленарон æмбырд. Уым архайдта æмæ раныхас кодта Уæрæсейы Президент Владимир Путин.

СЛАНТЫ Аслан

ОСТАВЬТЕ ОТВЕТ

Please enter your comment!
Please enter your name here