— Тынг зын мын вæййы, куы бакæсын, мæ уарзон газеты тираж къаддæрæй-къаддæр кæны, зæгъгæ, уый, — у йæ сагъæс поселок Фыййагдоны цæрæг ФÆРНИАТЫ Райæйæн.
Иу хъуыддаг сагъæс кæнын у, иннæ — хъуыддагыл кусын. Стыр дисы нæ бафтыдта, газет рафыссыныл удуæлдайæ архайы, зæгъгæ, куы базыдтам Куырттаты комы уæвгæйæ, уæд. Ис ма нæм Ирыстоны, æхсæнадон цардыуагыл зæрдæйæ чи тыхсы, ахæм адæймæгтæ. Сæ иу — Фæрнион.
— Диссаг мæм цы кæсы, уый зонут, куыд нæ уал фыссынц газет «Рæстдзинад»? Цыппор аст азы бакуыстон ахуыргæнæгæй скъолайы, æмæ-иу нæм куы бахатыдысты, газет рафыссут, зæгъгæ, уæд фондз газетæй къаддæр никуы рафыстон. Сæрæй алы хатт дæр «Рæстдзинад» лæууыд. Уый куыд раст у, æмæ ирон хæдзар нæ адæмон газет нæ исынц?
