Уыд Республикæ Цæгат Ирыстон-Аланийы Парламенты советы радон æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст федералон æмæ республикон закъонты проекттæ æмæ Уæрæсейы Федерацийы иуæй-иу субъектты закъонæвæрынадон хъæппæристæ.
Парламенты закъонæвæрынады, закъонад æмæ бынæттон хиуынаффæйады комитеты сæрдар Черчесты Аслан æркæсынмæ цы республикон закъонты проекттæ æмæ закъонæвæрынадон хъæппæристæ рахаста, уыдоны ныхас цыд лæвар юридикон æххуыс республикæйы ноджы тынгдæр рапарахат кæныныл, бынæттон хиуынаффæйады оргæнтæн сæ куысты уагæвæрд фæбæлвырддæр кæныныл, æнахъомты ‘хсæн барадхалæн цаутæ не ‘руадзыныл, æвæгæсæгдзинады профилактикæ æмæ æндæр фарстатыл.
«2023 азы Республикæ Цæгат Ирыстон-Аланийы республикон бюджет сæххæст кæныны тыххæй» Республикæ Цæгат Ирыстон-Аланийы закъоны проект депутаттæн сæ размæ рахаста Парламенты бюджет, хъалонтæ, исбонад æмæ кредитон организациты комитеты сæрдар Хæдарцаты Аслæнбег. Куыд радзырдта, афтæмæй ивгъуыд азы республикон бюджеты æфтиæгтæ рауадысты 51 миллиард æмæ 965 милуан сомы бæрц, хæрдзтæ – 54 миллиард æмæ 727 милуан сомы бæрц, бюджеты кадавар – 2 миллиард сомæй фылдæр. Ацы азы 1 январмæ республикæйы паддзахадон хæс уыд 11 миллиард сомы.
Хæдарцаты Аслæнбег ма ныхас кодта, республикæйы Хицауад Парламентмæ æркæсынмæ кæй бавдыста, «2024 азмæ æмæ 2025-2026 азты пъланон рæстæгмæ Республикæ Цæгат Ирыстон-Аланийы республикон бюджеты тыххæй» Республикæ Цæгат Ирыстон-Аланийы закъонмæ ивддзинæдтæ бахæссыны тыххæй» Республикæ Цæгат Ирыстон-Аланийы уыцы закъоны проекты фæдыл. Куыд загъта, афтæмæй федералон бюджеты уæлæмхасæн æххуысы фæрцы ивынц республикон бюджеты сæйраг бæрæггæнæнтæ – æфтиæгтæ, хæрдзтæ, стæй бюджеты кадавар дæр. Уæлæмхасæн финансон æххуысæй пайдагонд æрцæудзæн социалон нысантæ æххæст кæныныл. Уымæй уæлдай, уыцы æххуыс ахъаз уыдзæн бюджетон къабазы æнæкъуылымпы куыстæн.
Социалон нысаниуæджы республикон къорд закъоны проекттæ советы уæнгтæн сæ размæ рахаста Парламенты социалон политикæ, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ. Закъонæвæрынадон хъæппæрис баст у, бинонты политикæйы уагæвæрдтæ, стæй, сывæллон хæссынмæ чи райста, уыцы адæймагæн бафыстыты уагæвæрд æмæ сæ бæрц банывыл кæнынимæ, сидзæрæй кæнæ æнæ ныййарджыты æвджид баззайæг сывæллæттæн социалон æххуысы уæлæмхасæн зæрдæдарæнтæ æххæст кæнын æмæ æндæр фарстатимæ.
Депутаттæ байхъуыстой «2014-2024 азтæм «Республикæ Цæгат Ирыстон-Аланийы туристон-рекреацион комплексы райрæзты тыххæй» Республикæ Цæгат Ирыстон-Аланийы паддзахадон программæ сæххæст кæнынæн 2022-2023 азты республикон бюджетæй цы фæрæзтæ радих кодтой, уыдонæй сæ нысанмæ гæсгæ куыд æмæ цас хæдзардзинæй æрцыд пайдагонд, уый сбæрæг кæныны ма-
дзæлтты тыххæй» республикæйы Цæстдарæн-нымайæн палатæйы хъусынгæнинагмæ. Раныхасгæнæг уыд аудитор Созæты Алан. Куыд радзырдта, афтæмæй амынд программæ сæххæст кæнынæн 2022 азы лæвæрд æрцыд 162 милуан æмæ 293 мин сомы, 2023 азы та – 323 милуан æмæ 343 мин сомы. Æппæт æхцатæ дæр хардзгонд æрцыдысты сæ нысанмæ гæсгæ. Программæ æххæстгонд цыд авд бæрæггæнæнмæ гæсгæ, æмæ уыдон дæр се ‘ппæт 2022 азы къухы бафтыдысты. Уый дзурæг у, программæ республикæйæн ахъаз кæй у, ууыл. 2023 азы бæрæггæнæнтæ та нырма уал нæма бахыгътой. Созæты Аланы ныхасмæ гæсгæ, бæрæггæнæн мадзæлттæ раргом кодтой, халæн цаутæ дæр. Уыдон баст уыдысты гранттæ дæттыны уагæвæрдтимæ æмæ сæ пайда кæныны æмгъуыдтæ æххæст кæнынимæ.
Фарстайы фæдыл æмдоклад скодта Парламенты национ политикæ æмæ фæсивæды хъуыддæгты фæдыл комитеты сæрдар Джиоты Георги æмæ уый дæр йе ‘ргом аздæхта гранттæ дæттыны фарста банывыл кæнынмæ.Раныхæсты фæдыл фарстытæ æмæ фиппаинæгтæ уыд Тускъаты Таймуразмæ, Парламенты Сæрдары хæдивæг Дойаты Светланæмæ, депутат Черчесты Асланмæ.
ДЕДЕГКАТЫ Зæлинæ
