Цæгат Ирыстоны кадджындæр хъæутæй иу у Хуымæллæг. Буцæн æй «Хортауджыты хъæу» дæр хонынц. Уымæй уæлдай ма дзы цард æмæ цæры, зарын, кафын, театралон аивад, спорт, политикæ æмæ царды æндæр къабæзты йæхи фæзминагæй чи ‘вдисы канд йæ райгуырæн хъæуæн нæ, фæлæ, нæ республикæ æмæ нæ бæстæйæн кад чи кодта æмæ кæны, ахæм адæм.
Ацы хъæуы Кæсæбиты Митяйы номыл Культурæйы хæ-дзары цы бирæ аивадон къордтæ ис, уыдоны ‘хсæн бæрæг бæлвырд бынат ахсы республикон æмæ Æппæтуæрæсеон театралон конкурсты лауреат Хуымæллæджы адæмон театр. Алы рæстæджыты йын арæхстджын разамынд лæвæрдтой: Хуымæллæджы астæуккаг скъолайы ахуыргæнæг Цæлойты Федыр, УФ-йы адæмон артисткæ Тменаты Еленæ, УФ-йы аивæдты сгуыхт архайæг Цæлыккаты Мæирбег, нæ республикæйы сгуыхт артисткæ Галазты Земфирæ, РЦИ-Аланийы аивæдты сгуыхт архайæг Гайты Михал… Ныртæккæ та йæ аивадон разамонæг æмæ режиссер у зындгонд драматург, Тæбæхсæуты Балойы номыл Ирон академион театры актер, РЦИ-Аланийы адæмон артист Айларты Асæхмæт. Уый æмæ хæдахуыр, фæлæ курдиатджын артисттæ, куыд хистæртæ, афтæ кæстæртæ дæр зæрдиагæй архайынц республикæ, район æмæ хъæуы æхсæнадон царды. Сæ репертуары ис ирон æмæ Цæгат Кавказы драматургты фыст пьесæтæм гæсгæ æвæрд алы жанрон спектаклтæ.
Ацы къам та ист æрцыд, Хуымæллæджы адæмон театр Туаты Дауыты пьесæмæ гæсгæ спектакль «Хæрзойты Фатъимæт» куы ‘вдыста, уæд. Йæ режиссер-æвæрæг уыд Цæлойты Федыр. Къам нæм редакцимæ æрбахаста Хуымæллæгæй рацæуæг æмæ йæ адæмон театры раздæры архайæг РЦИ-Аланийы Профцæдисон æмæ ветеранты змæлды зæрдиаг зиууон, не ‘нувыд газеткæсæг Æгкацаты Азæмæты фырт Зелим. Ис дзы йæхæдæг спектаклы Ханджерийы ролы, йæ фарсмæ иннæ архайæг та — Фатъимæты ролы хъæуы уæздандæр æмæ аивдæр чызджытæй иу Дзуттæгаты Эльмæ.
Къам ист æрцыд 1967 азы сентябры.
ГАСАНТЫ Валери
