Дзæуджыхъæуы Къомайты Русланы номыл космонавтикæйы скъолайы ахуырдзаутæ ацыдысты Мæскуымæ паддзахадон корпораци «Роскосмос»-ы инфраструктурон объекттæ фенынмæ.
Уæрæсейы сæйраг горæты уæвыны рæстæг фидæны космонавттæ бабæрæг кæндзысты музейтæ, заводтæ, Космосон атахтыты уынаффæйады центр, стæй, Къомайы-фырт 45 азы дæргъы кæм бакуыста, Лавочкины номыл ахæм наукон-куыстадон иугонды цехтæ. Ахуыры азы дæргъы хорз бæрæггæнæнтæ чи равдыста, Мæскуымæ ацыдысты космонавтикæйы скъолайы цыппар ахæм раззагдæр ахуырдзауы. Цæгатирыстойнæгтæ сæйраг горæты фæуыдзысты фондз боны дæргъы.
— Мæскуыйаг балцы рæстæг «Роскосмос»-ы инфраструктурон объекттимæ базонгæ уыдзыстæм. Фæсивæд æцæг рæстæджы фæткмæ гæсгæ, дунеон космосон станцæйы куыст кæй фендзысты, ууыл зæрдæ дарын. Горæт Химкийы Лавочкины номыл наукон-куыстадон иугондмæ ацæуынæн нын æнæхъæн бон раттой. Къомайты Руслан ацы куыстуаты бирæ азты дæргъы бакуыста. Иугонды коллектив нын лæвæрттæ раттынæй зæрдæ бавæрдта. Куыстуаты разамындимæ куыстадон цехтæ феныныл баныхас кодтам, — загъта космонавтикæйы скъолайы разамонæг Челдыты Зæлинæ.
Ирыстойнæгтæ Мæскуымæ балцы ацыдысты компаниты къорд «Бавари»-йы æххуысы фæрцы.
— Мæскуыйаг балцмæ æхсызгонæй æнхъæлмæ кастæн. Нæ балцæн бацæттæ кодтой мидисджын программæ. Ног зонгæтæ нын фæзындзысты, космосон науты макеттæ фендзыстæм. Инженеры куыстмæ стыр æргом здахын. Космосон техникæ комкоммæ уагæй феныны фадат мын кæй уыдзæн, уымæй райгонд дæн, — зæгъы скъолайы ахуырдзау Дзылыхты Ариант.
ХУАСДЗАУТЫ Алинæ
