Бирæгъ æрмахуыр кæнын нæ комы

0
20

Иу хатт мын иу цуанон ахæм хабар радзырдта. Бирæгъы лæппын сæхимæ æрхаста æмæ йын хом дзидза æппындæр нæ лæвæрдта. Хиконд дзулæй дæр-иу æй бафсæста. Дынджыр куыдзы ас сси, æмæ-иу æй йемæ цуаны акодта, стæй-иу фæстæмæ, дыууæ хæларау, хъæумæ æрыздæхтысты.
Иу изæр та æхсæвæддæ ацыдысты. Цуанон сугтæ æрæмбырд кодта, арт бандзæрста æмæ йæм хæстæг сбадт. Куыдз-бирæгъ раздæр йæ чъылдыммæ сбадт, стæй сыстад, кæдæмдæр ацыд æмæ цасдæры фæстæ донластæй æрбаздæхт, артмæ хæстæг бацыд, йæхи ныттылдта, архайдта, цæмæй йæ доны æртæхтæ зынгтыл хауой, ууыл. Стæй та ногæй ацыд, æрбаздæхт æмæ арты сæрмæ йæхи стылдта.
Ныр, дам, æз уæдмæ ницæуыл гуырысхо кодтон, зæгъгæ, дзырдта, цуанон. Фæлæ æртыккаг хатт куы аздæхт, уæд, дам, загътон, ай дзæгъæлы афтæ нæ кæны, ам цыдæр уыдзæн. Йæ быны тыд цы дзаумæттæ уыд, уыдон арты фарсмæ ныууагъта, суджы стыр лыггаг дзы сæвæрдта æмæ йæ æрæмбæрзта, цыма дзы исчи ис, уыйау, йæхæдæг бæласы сæрмæ сбырыд æмæ уырдыгæй кæсы, цымæ, дам, дарддæр цы уаид.
Бирæгъ та ноджы хуылыдздæрæй фездæхт, арты сæрмæ йæхи бауыгъта, стæй дзы зынг куы нал зынд, уæд, лæг кæм хъуамæ хуыссыдаид, ууыл йæхи ныццавта, дзаумæттæ иуварсмæ фехста, фæлæ дзы суг куы разынд, уæд йæ фæстæгтыл æрбадт æмæ дам-иу арвмæ нынниудта!
Æмæ йæ уæд лæг бамбæрста: ахæм уавæрты, ома, тар æхсæвы, арты тæвд æмæ адæймаджы тавсмæ уымæн йæ сырддондзинад ногæй райгас ис, æмæ дзы уыцы уысм фæстæмæ бирæгъ рауад, суанг ма йе схъомылгæнæджы дæр бахордтаид.
Æргæрах æй кодта цуанон бæласы сæрæй, афæлдæхта йæ арты фæстаг хъарм цæхæртыл.

ХЪУППЕТЫ Алыксандыр,
цуанон

ОСТАВЬТЕ ОТВЕТ

Please enter your comment!
Please enter your name here