Знон РЦИ-Аланийы Сæргълæууæг Сергей МЕНЯЙЛО «сырх» дипломтæ ратта ЦИПУ-йы 108 рауагъдонæн. Кадджын мадзалы райдайæн сын нæ республикæйы разамонæг зæрдиаг арфæ дæр ракодта, цардмæ сæ цы ног фæндæгтæ хонынц, уыдоныл ныфсджынæй, фидар къахдзæфтæй куыд ацæуой, уый сын загъта.
— Мæн æмæ сымах æхсæн стыр хицæндзинад ис. Æз сымах хуызæн ахæм цымыдисаг æнкъарæнтæ нал райсдзынæн. Кæддæр уыдтæн студент æмæ бирæ фæлварæнтæ лæвæрдтон, хорз ахуыры тыххæй райстон бæрзонд бæрæггæнæнтимæ диплом. Скъолайы фæстæ уæ алчидæр хъуыды кодта, цавæр дæсныйад равзара, ууыл. Ныр та уæм æнхъæлмæ кæсынц уæ дæсныйæдты фæндæгтæ. Ныфсджынæй сыл ацæут, макуы æвзарут æнцон фæндæгтæ, адæймаг цардæн хъуамæ бавзара йæ хуыздæр æмæ æппæрццæг фæрстæ дæр. Кæд уæлдæр ахуырад дæр райстат, уæддæр ахуыр кæнын кæддæриддæр ахсджиаг фарста у. Хистæрты хорз миниуджытыл, æмгæртты æнтыстдзинæдтыл. Фæлæ уæ архайдæн уæхæдæг дзуапп дæттут кæдфæндыдæр, — загъта Сергей Меняйло.
108 рауагъдонæй иу уыд, юридикон факультеты студент, сæрмагонд æфсæддон операцийы архайæг Хъулаты Таймуразы фырт Ацæмæз. Ацæмæз Украинæмæ барвæндонæй ацыд. Университеты ахуыры рæстæг фехъуыста нæ бæстæйы Президенты раныхас, ногæй та фашизм йæ кæнонтæ райдыдта æмæ не ‘мзæххонты Донбассы удхарæй мары, зæгъгæ, уæд фыццаг бонты атагъд кодта неонацистты ныхмæ хæцынмæ, мæгуыр сабырцæрæг адæмы тугмондаг «бирæгътæй» фервæзын кæнынмæ. Тынг цымыдисаг уыд, Ацæмæз журналистты фарстытæн сыгъдæг, аив æмæ рæсугъд ирон æвзагыл дзуаппытæ куы лæвæрдта, уæд.
— Фыдыбæстæйыл тохы бонтæ æнусты дæргъы кодта, æмæ нæ фыдæлтæ цы хъæбатырдзинад равдыстой хæсты быдыры, уыдонæй æз тынг сæрыстыр уыдтæн æмæ дæн. Хæст макуыуал уæд, нæ кæстæртæ уыцы диссæгтæ мауал бавзарæнт. Æз та мæхицæн хæсыл банымадтон, Фыдыбæстæ хъахъхъæнджыты фарсмæ зын сахат æрбалæууын. Мæ ахуыр фæстаг дыууæ азы къуылымпы кодта, Украинæмæ кæй ацыдтæн барвæндонæй, уый тыххæй. Фæлæ мын ахуыргæнджытæ баххуыс кодтой, цæмæй мæ ахуыр кæронмæ фæуыдаин, æмæ сын бузныг зæгъын, — дзырдта Хъулаты Ацæмæз.
ЦИПУ-йы рауагъдонтæн ма арфæтæ ракодтой РЦИ-Аланийы ахуырад æмæ наукæйы министр Алыбегты Эллæ æмæ ректор Огъуаты Алан.
САУТÆТЫ Тамилæ
