Æппæтуæрæсеон театралон фыццаг фестиваль «Вахтангов. Путь домой» райдайдзæн Дзæуджыхъæуы 13 июлы æмæ ахæсдзæн 19 июлмæ. Фестивалы хъæздыг программæйы тыххæй ныхас цыдис журналисттимæ пресс-конференцийы. Архайдтой дзы РЦИ-Аланийы Хицауады Сæрдары хæдивæг ПЛАТЫ Альбинæ, Вахтанговы номыл театры директор Кирилл КРОК, фестивалы директор Алексей НИКИТИН, Уæрæсейы адæмон артист, Щукины номыл театралон институты ректор Евгений КНЯЗЕВ, Цæгат Ирыстоны Тæбæхсæуты Балойы номыл паддзахадон Ирон академион театры аивадон разамонæг УАЛЫТЫ Гиви æмæ Уынгты театрты программæты арт-директор Мария ЛИТВИНОВА.
Фестивалы ном хуымæтæджы нæ равзæрстой. Вахтанговы хæдзар куы байгом, уæдæй нырмæ зындгонд режиссеры ном æмæ йæ райгуырæн бæстæ Ирыстонмæ стыр цымыдисдзинад æвдисынц бирæ театруарзджытæ Уæрæсейы алы регионтæй.
Фестиваль саразæг — «Евгений Вахтанговы номыл Театры райрæзт æмæ æххуысы центр».
Æппæтуæрæсеон фестивалы архайынмæ æрбацæудзысты Уæрæсейы регионты хуыздæр театртæ. Ирыстойнæгтæ базонгæ уыдзысты сæ хуыздæр спектакльтимæ. Ахæм стыр аивадон бæрæгбон нырæй фæстæмæ суыдзæн æрвылазон, æмæ райдайдзæн Вахтанговы ног æнус.
Фестивалы ахадындзинады тыххæй нæ культурон царды радзырдта Кирилл Крок.
— Æз тынг сæрыстыр дæн Вахтанговы хæдзары æнтыстдзинæдтæй. Бирæ стыр сахарты театралон фæзтæ сæм батæхуды кæндзысты, фестивалы архайынмæ ссæудзæн 450 адæймаджы — актертæ, режиссертæ, техникон кусджытæ Татарстан, Донецк, Омск, Архангельск æмæ æндæр рæттæй. Спектакльтæм билеттæ уайтагъд уæйгонд æрцыдысты. Уый дзурæг у ууыл, æмæ театрдзаутæ стыр æууæнк кæй æвдисынц уазæг-артисттæм, æмæ фæсмойнаг нæ уыдзысты, — загъта Кирилл Крок.
Фестивалы архайджытæн цы зæрдылдарæн лæвар бацæттæ кодтой, уый тыххæй радзырдта.
Бæрæгбоны фылдæр хай цæудзæн Сабырдзинады проспект æмæ Къостайы номыл фæлладуадзæн парчы. Кæронбæттæны Сæрибары фæзы 19 июлы та алкæмæн дæр фадат уыдзæн, æхсæз сахаты чи цæудзæн, ахæм концертон программæмæ лæвар бакæсын. Архайдзысты дзы уæрæсейаг хуынд зарæггæнджытæ æмæ ирыстойнаг артисттæ.
Алексей Никитин радзырдта, фестивалы фæлгæты, Ирыстоны сфæлдыстадон фæсивæды минæвæрттæн, республикæйы рæзтмæ аккаг æвæрæн чи хæссы, уыдонæн премитæ кæй бацæттæ кодтой, уый тыххæй.
Уынгты равдыстытæн цавæр хъуыды ис, цæмæй хицæн кæнынц иннæ спектакльтæй, карнавалтæ æмæ адæмы иудзинады тыххæй дзырдта Мария Литвинова.
Дзæуджыхъæуы фыццаг хатт цæудзысты ахæм равдыстытæ. Уыдонæй райдайдзæн фестиваль. Зæрдæмæдзæугæ, ирд æмæ рæсугъд бæрæгбонмæ алкæй дæр хонæм, — загъта уый.
Пресс-конференцийы ма ныхас кодтой æндæр цымыдисаг фарстатыл дæр.
ЦÆГÆРАТЫ Жаннæ,
къам систа Татьянæ ШЕХОДАНОВА
