Ног ахуыры азы райдайæнмæ Цæгат Ирыстоны скъолатыл байуардзысты ахуырадон литературæйы 370 мин экземплярæй фылдæр. Уыцы нысанæн республикæйы разамынды уынаффæйæ радих кодтой зынгæ финансон
фæрæзтæ.
Уый тыххæй фехъусын кодта РЦИ-Аланийы Ахуырад æмæ наукæйы министрады пресс-службæ.
Министрады минæвар куыд радзырдта, афтæмæй РЦИ-Аланийы Сæргълæууæг Сергей Меняйлойы амынддзинадмæ гæсгæ, ахуырадон чингуытæ балхæнынæн республикæйы бюджетæй дихгонд æрцыд 265 милуан сомæй фылдæр. Республикæйы разамонæг профилон ведомствæйы минæвæрттæн бафæдзæхста чингуытæ æппæт кълæстæн дæр самал кæнын, цæмæй ныййарджытæн сæхи чингуытæ æлхæнын ма бахъæуа.
Ахуырад æмæ наукæйы министрады минæвар зæрдыл æрлæууын кодта, фарон ног чингуытæ 1-, 5– æмæ 6-æм кълæсты ахуырдзаутæн кæй балхæдтой, уый. Асæрды нысангонд æлхæнинæгтæ куы бакæной, уæд Цæгат Ирыстоны скъолаты ифтонгдзинад ахуырадон литературæйæ схæццæ уыдзæн 100 процентмæ.
Æмæ ма иу фиппаинаг. Скъолатæм цы ног чингуытæ фæхæццæ уа, уыдон иууылдæр дзуапп дæттынц федералон паддзахадон ахуырадон стандартты домæнтæн.
КАЛМАНТЫ Аслан
