Ивгъуыд сабаты Дзæуджыхъæуы йæ куыст райдыдта фыццаг æппæтуæрæсеон театралон фестиваль «Вахтангов. Путь домой». Къуырийы дæргъы Ирыстон æмæ йæ уазджытæ сты театралон аивады стыр бæрæгбоны архайджытæ. Фестивалон программæйы ирддæр æмæ дзыллондæр мадзал суыдзæн стыр кæронбæттæн концерт. Уый уыдзæн абон Сæрибары фæзы.
Зындгонд куыд у, афтæмæй ацы егъау культурон мадзал арæзт цæуы Евгений Вахтанговы номыл мæскуыйаг академион театры разамынды хъæппæрисæй. Уыимæ, фестиваль цæттæгæнæг комитеты уынаффæйæ, аивады ацы бæрæгбон, Евгений Вахтанговы номæй уæлдай, æнгом баст у РЦИ-Аланийы сарæзты 100 азы æмæ республикæйы иннæ зæрдылдарæн юбилейтимæ. «Вахтанговонты» фæндон хорзыл банымайгæйæ, сæ фарсмæ балæууыдысты РЦИ-Аланийы разамынд, республикæйы Хицауад æмæ Культурон хъæппæристы президентон фонд. Уыдоны æмхъару архайдæй фестиваль сырæзыд, йæ программæ рауад хъæздыг æмæ цымыдисаг – ууыл æмхъуыды сты, фестивалон мадзæлттæ чи бабæрæг кодта, æппæт уыцы адæм дæр.
Фестиваль Сабырдзинады проспекты стыр карнавалон парадæй байгом кæнгæйæ, бæрæгбон акъахдзæф кодта горæты иннæ фæзуæттæм: Хетагкаты Къостайы номыл фæлладуадзæн паркмæ, Ирон æмæ Уырыссаг театрты сценæтæм, «Вахтанговы хæдзар»-мæ…
Фестивалы сæйраг программæйы архайдтой А. Пушкины номыл театр (Мæскуыйæ), театр «Мастерская» (Бетъырбухæй), В. Качаловы номыл театр (Хъазанæй), Донецкы фæсивæдон театр (Макеевкæйæ), Драмæйы театр (Омскæй), М. Ломоносовы номыл театр (Архангельскæй) æмæ Тæбæхсæуты Балойы номыл Ирон академион театр. Цалдæр уæрæсейаг горæты «уынгты» театртæ та сæ спектаклтæ æвдыстой Сабырдзинады проспект æмæ Хетæгкаты Къостайы номыл фæлладуадзæн парчы гом фæзуæтты. Уымæй уæлдай, фестивалы программæйы бынат уыд æндæр аивадон мадзæлттæн дæр: концерттæн, ахуырадон лекцитæн, сфæлдыстадон фембæлдтытæн, равдыстытæн….
Кæй зæгъын æй хъæуы, ахæм стыр бæрæгбонæн хатдзæгтæ кæнæн рæстæг нырма разæй ис, уымæн æмæ программæйы мадзæлттæ се ‘ппæт нæма ахицæн сты. Фæлæ уæддæр цавæрдæр рагагъоммæ фиппаинæгтæ æмæ фæндиæгтæ ныридæгæн дæр ис скæнæн. Уый фæдыл аныхас кодтам фестивалы директор Алексей Никитинимæ.
«Дзæуджыхъæумæ алкæддæр зæрдæрухсæй ссæуын, зонын æй, Ирыстон йæ уазджытыл куыд баузæлы, уый. Æмæ ацы радон балцæй дæр исын разыдзинады æнкъарæнтæ. Фыццаджыдæр, горæты цæрджытæ фестивалмæ цы цымыдисдзинад равдыстой, уымæй. Сæйраг программæйы архайæг театрты спектаклтæм билеттæ мæйы размæ дæр ссарæн нал уыд! Фестивалы иннæ мадзæлттæ дæр рауадысты дзыллон æмæ зæрдæмæдзæугæ. Уыимæ, куыд рахатыдыстæм, афтæмæй бирæ адæм фестивалмæ ссыдысты æндæр уæрæсейаг горæттæй дæр. Уыцы æууæл нын ныфс дæтты фидæны фестивалыл ноджы бæстондæр бакусынæн, ирыстойнаг аивадуарзджыты æндæр театралон къордтимæ базонгæ кæнынæн. Дыккагæй та, мæ разыдзинад баст у, Дзæуджыхъæу хуыздæрæрдæм куыд ивы, куыд рæзы, уыдæттимæ. Дзæуджыхъæу æцæгæйдæр Цæгат Кавказы культурон столицæ кæй у, уымæн ма иу æвдисæн фестиваль «Вахтангов. Путь домой» кæй суыдзæн, ууыл мæ зæрдæ дарын. Æмæ сæрмагондæй бузныг зæгъын, нæ программæйы мадзæлттæм чи саккаг кодта, æппæт уыцы адæмæн. Уырны мæ, фидæн азы ногæй кæй фембæлдзыстæм, уый», – радзырдта Алексей.
Фестивалы директор горæтæгты фæхуыдта кæронбæттæн концертмæ дæр. Уый абон райдайдзæн 16 сахатыл. Алексей Никитины ныхасмæ гæсгæ, цæттæгæнæг комитет бацархайдта, цæмæй уыцы концерт дæр рауайа зæрдæагайгæ, мæскуыйаг æмæ ирыстойнаг артистты курдиатæй рафидауа. Æрмæст йæ архайджыты нæмттæ дæр бирæты сцымыдис кæндзысты изæры Сæрибары фæзмæ абалц кæнынмæ: Аннæ Шатилова, Александр Олешко, Сергей Лазарев, Ольгæ Кормухина, Альберт Макаров, Эльдар Трамов, Александр Коренюгин, Хадыхъаты Аллæ, Бесолты Дианæ æмæ бирæ æндæртæ. Уыдонæй уæлдай, вокалон къордтæ æмæ кафджыты ансамблтæ: «Республика», «Домисолька», «АрТрио», «Алан», «Фидæн», «Ритмы гор» æмæ иннæтæ. Уыцы музыкалон-хореографион марафон цæудзæн 6 сахаты! Уый, æнæмæнг, уыдзæн фыццаг æппæтуæрæсеон театралон фестиваль «Вахтангов. Путь домой»-ы аккаг кæронбæттæн…
СЛАНТЫ Аслан
