Уæрæсейы Фæлхасадон цæстдарды регионалон управлени бæрæг кæны, харбызтæ æмæ неситæ кæм уæй кæнынц, уыцы базаргæнæн бынæттæ. Уæлдай æргом здæхт цæуы, сæ хæрзхъæддзинады фæдыл Гигиенæ æмæ эпидемиологийы центр цы лабораторон иртæстытæ аразы, уый протоколтæм.
Ныридæгæн уал домæнтæн дзуапп дæттынц. Бæрæг сæ кæндзыстæм дарддæр дæр, – зæгъы регионалон управленийы санитарон цæстдарды хайады хицауы хæдивæг Хъулаты Алан.
Фæндæгтыл сæ чи уæй кæны, уыцы продукци лабораторон иртæстытæ нæ ацыдысты. Тæссаг у, харбызтæ æмæ неситæ химион буаргъæдтæй, сальмонеллез, кæнæ ботулизм расайæг микроорганизмтæй хъæстæ куы уой, уымæй. Æлхæнынмæ нæ бæззынц, кæй алыг кодтой, кæнæ чи фæхъæн, ахæм харбыз æмæ неси. Йæ хуыз ирд, кæнæ ныхмæвæрд ахорæнтæ кæмæн уой, ахæмтæ хæрзхъæд, æнæзæрдæхсаинаг сты. Цы фарсыл хуыссыд харбыз, уымæн йæ хуыз ирд бур, кæнæ хурæнгæс хъуамæ уа. Йæ бицъи æмæ зиллакк хус хъуамæ уой, йæ уæлцъар та, ныхæй йæ акъахгæйæ, хъуамæ хъæн ма кæна, армæй йæ куы бахойай, уæд бариза, æнгуылдзæй йæ бахойгæйæ та – ныззæлланг кæна.
– Фæндаджы былтыл сæ хæдтулгæтæй чи уæй кæны, уыдоны бахча кæнæ лабораторон иртæстытæ нæ ацыдысты, науæд та йæ хæрзхъæддзинадмæ фау æрхæссæн ис. Йæ уæлцъар кæмæн фæхъæн, уыцы харбыз æмæ несийы бактеритæ сбирæ вæййынц æмæ сæ бон у сальмонеллез, кæнæ ботулизм расайын, – амоны æлхæнджытæн Хъулаты Алан.
Хæрзхъæд неси кæны ваниль, ананас, кæнæ кæрдойы тæф – уый рæгъæд кæй у, уый æвдисы. Бафæлварут æй, йæ фарс ын бахойгæйæ, æмыр зæлланг дæр у, кæй сцæттæ, уый æвдисæн. Æркæсут, неси дидинæг кæм калдта, уыцы бынатмæ – хъуамæ иу чысыл фæлмæн уа. Йæ зæнг фенын дæр уæ ма ферох уæд, несийы зæнг хъуамæ уа хус.
ХУЫБИАТЫ Ларисæ
