Йӕ чысылӕй фӕстӕмӕ ДЫГЪУЫЗТЫ Зӕринӕ уарзы куклатӕ кӕнын. Куыстӕй йын уӕгъд рӕстӕг куы фӕвӕййы, уӕд ӕрбады ӕмӕ бавналы, йӕ удӕн ӕхцон чи у, уыцы ми кӕнынмӕ — ног кукла аразынмӕ.
Йӕ куклатӕй иу иннӕйы ӕнгӕс нӕу, иу иннӕмӕй канд ӕддаг бакастӕй нӕ хицӕн кӕны. Сӕ кӕнӕг дзы бауадзы уд. Фых ӕлыг, уӕфтаг (сатин), хызгонд (кружево), фӕрдгуытӕ, синаг ӕмӕ ахорӕнтӕй Зӕринӕ йӕ миддунейы ӕнкъарӕнтӕ бафтауы куклайы фӕлгонцы. Уӕйӕн сӕ, мыййаг, нӕ кӕны — йӕ уды дзӕбӕхӕн, цас карздӕр у йӕ алыварс дуне, уыйас зӕрдӕхӕлардӕр рауайынц йӕ куыстытӕ.
— Уарзын сӕ лӕвар кӕнын, ӕхцондзинад мын хӕссы, кӕмӕн сӕ балӕвар кӕнын, уыцы адӕймаджы цин куы сӕ райсынц, уӕд, — зӕгъы Зӕринӕ. Чысыл уыд нырма, афтӕмӕй сӕ райдыдта ӕндӕхтӕй аразын. Ног аз у йӕ уарзондӕр бӕрӕгбон. Цы хъазӕнтӕ-иу скодта, уыдон-иу байуӕрста лӕварӕн, сӕ «цауддӕртӕ» та иу сӕхи заз бӕласыл баззадысты ауыгъдӕй. Куыдфӕстӕмӕ чызг фӕцайдагъ куклатӕ кӕныныл. Уӕдӕй дзы дзӕвгар скодта, фӕлӕ, йӕхӕдӕг куыд зӕгъы, афтӕмӕй йын уарзондӕр йӕ фыццаг куыст — сыфтӕрӕй ӕмбӕрзт фынӕй саби у. Уый дӕр йӕ зонгӕйӕн балӕвар кодта.
— Фыццаг уал иумӕйаг фӕлгонц ӕрлӕууы мӕ зӕрдыл, лыстӕг хӕйттӕ та — куы йыл фӕкусын, уӕд. ӕрхуым хъуыдытӕ, цардӕвзарӕнты рӕстӕг диссаджы хос у ацы куыст. Мӕхи куклаты аразӕджы дӕсныйыл нӕ нымайын, мӕнӕй хуыздӕртӕ бирӕ ис, фӕлӕ, мӕ миддуне ӕргом кӕнынӕн мадзал кӕй ис, уымӕй разы дӕн. Мӕ кӕстӕртӕ байрӕзтысты, кӕстӕр чызг дӕр уарзы хъазӕнтӕ кӕнын, лӕппу та у нывгӕнӕг. Сӕ туджы ис аивадмӕ уарзондзинад, — зонгӕ нӕ кӕны йӕ кӕстӕртимӕ Зӕринӕ.
Классикы загъдау, адӕймаджы ӕппӕт дӕр хъуамӕ уа рӕсугъд. Ацы зӕгъинаг комкоммӕ Дыгъуызты Зӕринӕмӕ дӕр хауы. Царды рухс тынтӕ чи тауы, йӕ къухвӕллойӕ адӕмы зӕрдӕтӕм циндзинад чи хӕссы, дуне ахӕмтӕй фидауы.
ХУЫБИАТЫ Ларисӕ,
авторы ист къам
