Дзӕуджыхъӕуы Гасситы Викторы номыл рауагъдадон-полиграфион куыстуаты мыхуыры рацыд зындгонд прозаик-документалист, поэт, публицист, РЦИ-Аланийы адӕмон фыссӕг ДАУЫРАТЫ Дамиры ног чиныг «Уастырджийы кӕстӕр ӕфсымӕр». Автор дзы лӕмбынӕг ӕмӕ бӕстон ныффыста УФ ӕмӕ нӕ республикӕйы адӕмон артист, Хетӕгкаты Къостайы номыл паддзахадон премийы лауреат, театр ӕмӕ кинойы номдзыд актер УАТАТЫ Бибойы цард ӕмӕ бирӕвӕрсыг сценикон сфӕлдыстады тыххӕй бирӕ зӕрдӕагайгӕ хабӕрттӕ.
Ирон адӕмӕн номдзыд актер, нӕ республикӕйы культурӕйы раздӕры министр йӕ адӕймагдзинад, йӕ уарзӕгой парахат зӕрдӕйы ахаст, цӕхӕркалгӕ сценикон курдиатӕй нӕ бӕстӕ ӕмӕ Ирыстоны аивадӕн цы хӕрзты бацыд, уый тыххӕй дзы Дамир фыссы йӕхи хъуыдытӕ. Уататы Бибойы хорз чи зыдта, йӕ цыбыр царды дӕр стыр ӕмӕ алыхуызон хорздзинӕдты кӕмӕн бацыд, ӕмӕ дзы цӕрӕнбонтӕм куыд бузныгӕй баззадысты, уый тыххӕй ног чиныджы сӕ хъуыдытӕ зӕгъынц номдзыд артисты хиуӕттӕ, культурӕ ӕмӕ аивады зындгонд архайджытӕ, ӕхсӕнады минӕвӕрттӕ: Уататы Азӕ, Бибойы чызджытӕ Агуындӕ ӕмӕ РЦИ-Аланийы адӕмон артисткӕ, паддзахадон ансамбль «Алан»-ы раздӕры солисткӕ Уататы Зӕринӕ, нӕ республикӕйы сгуыхт ӕмӕ адӕмон нывгӕнджытӕ Гасынты Жорж, Дзбойты Михал, Дзанайты Руслан, Ходы Никъала, УФ-йы адӕмон артист, зындгонд музыкант Гӕздӕнты Булат, кино ӕмӕ театры артисттӕ, режиссертӕ Дагун Омаев, Тлаттаты Бексолтан, Бекъойты Розӕ, Хӕбӕлаты Олег, Уататы Бибойы фыдыфсымӕры чызг Беллӕ, зындгонд дохтыр Джерапты-Белеккаты Иринӕ, зындгонд поэттӕ Кокайты Тотрадз, Чеджемты ӕхсар, Ходы Камал, Хӕмыцаты Албег, Хуытыгаты Хъазыбег, профессор Цыбырты Людвиг…
Се ‘ппӕты мысинӕгтӕ сты зӕрдӕагайгӕ, худӕг кӕнӕ цыргъзонд цауты бындурыл арӕзт. Ирд ӕмӕ ӕнцонӕмбарӕн ӕвзагӕй фыст, зонды хос — кӕстӕртӕн, цин ӕмӕ сӕрыстырдзинады ӕфсон — хистӕр ӕмӕ астӕуккаг фӕлтӕры чиныгкӕсджытӕн.
Нӕ литературӕйы раздӕр ӕмӕ ныр дӕр мысинӕгты жанрмӕ фаг ӕргом здӕхст нӕ цӕуы. Уый цыма, раст нӕу, афтӕ мӕм кӕсы. Адӕм кӕй уарзтой, йӕхӕдӕг дӕр сын аргъгӕнӕг чи уыди, уыцы артист, зарӕггӕнӕг фыссӕг, ахуыргонд, ахуыргӕнӕг кӕнӕ царды ӕндӕр къабӕзты зӕрдиаг архайӕг, хӕрзуд адӕймаг цардӕй куы ацӕуы, уӕд йӕ номыл лӕджы зӕрдӕйы баззайы ӕрмӕстдӕр иу ныфсы хал рӕстаг лӕджы ном ӕмӕ арфӕйаг хъуыддӕгтӕ зӕрдыл дарыны нысанӕн. Уыдон сты мысинӕгтӕ. Сӕ фӕрцы ӕнкъарӕнджынӕй равдисӕн ис, ацы зӕххыл хорзӕй чи цард, уыцы адӕймаджы сурӕт. Ахӕм хъуыдыйыл бафты чиныгкӕсӕг, Дауыраты Дамиры чингуытӕ кӕсгӕйӕ. Йе сфӕлдыстадон фӕндаг ныр цыппор азӕй фылдӕр арӕзт у бирӕ арфӕйаг нысантӕй ӕмӕ хӕстӕй. Сӕ иууыл ахсджиагдӕр — Иры фарны лӕгты нӕмттӕн кад кӕнын, мӕрдтӕм сын ӕгъдау дӕттын.
Номдзыд актер, ӕцӕг ирон нӕртон лӕг, уарзон фыд ӕмӕ буц хистӕр Уататы Бибойы тыххӕй ног чиныг «Уастырджийы кӕстӕр фырт»-ы мысинӕгтӕ ӕмӕ авторы зӕрдиаг хъуыдытӕй уалдай ис хуызджын къамтӕ, артисты тыххӕй номарӕн ӕмдзӕвгӕтӕ, кино ӕмӕ театры цы бирӕ рольтӕ ахъазыд, уыдоны номхыгъд. Уӕлдай зӕрдиагдӕрӕй йӕ бакӕсдзысты ӕмӕ хорз ӕххуыс фӕуыдзӕн сӕ рухстауӕн архайды дзыллон хабархӕссӕг фӕрӕзты, чиныгдӕтты, Культурӕйы хӕдзӕртты, театрты ӕмӕ музейты кусджытӕн, аивадиртасджытӕн, ирон ӕвзаг ӕмӕ литературӕйы ахуыргӕнджытӕ, студенттӕ ӕмӕ скъоладзаутӕн, чиныгкӕсджытӕн. Йӕ тираж у 300 экземпляры. Чиныг цӕмӕй мыхуыры рацӕуа, уый тыххӕй Дамирӕн ӕхцайӕ баххуыс кодта УФ-йы Паддзахадон Думӕйы депутат Мӕхъиты Зураб, Уататы Бибойы цард бирӕвӕрсыг сфӕлдыстадон архайдыл дзурӕг къамтӕй та йӕм хорз фӕкастысты РЦИ-Аланийы Тӕбӕхсӕуты Балойы номыл Театралон аивады музейы кусджытӕ. Чиныг иттӕг аив сфӕлгонц кодта дӕсны нывгӕнӕг Татьянӕ Алипченкова.
