Æнæххæст бæрнондзинды æхсæнад «Радужная форель» Цæгат Ирыстоны аразы кæсаггуыстгæнæн цех.
Куыстуаты генералон директор Виктор Лапченко куыд радзырдта, афтæмæй сæ куыст уыдзæн ахсджиаг, уымæн æмæ ацы продукци фæлхасгæнджытæ тынг фæрсынц. Аквакультуртæ Уæрæсейы алы рæттæм чи ласы, стыр ахæм кæсаггуыстгæнджыты ‘хсæн ис Цæгат Ирыстон дæр. Ардыгæй кæсаг ласт цæуы Уæрæсейы хуссармæ. «Нæ зæрды ис нæ куыст рапарахат кæнын, кæсаг дарын æмæ йæ ласыны домæнтæ æххæстгонд куы цæуой, уæд куыстгонд ацы продукцийæн дарæн уыдзæн 10-14 боны дæр», – зæгъы Виктор Лапченко.
Продукцийы хуызтыл бафтдзæн цæхджын æмæ, фæздæгмæ даргæйæ кæй сцæттæ кæнынц, ахæм кæсаг дæр. Дарддæр та фæнд кæнынц консервтæ кæнын, стæй ма – балергæсагæй алыхуызон кулинарон хæринæгтæ. Ахæм цех саразыны хъуыддаг къухы бафтыд Хъæууон хæдзарады министрады гранты æмæ компанийæн йæхи фæрæзты фæрцы. Пъланмæ гæсгæ, афæдзы кæронмæ цехы бæстыхай хъуамæ уа цæттæ, стæй хъуамæ балхæной хъæугæ промышленнон ифтонггæрзтæ. 2025 азы та куыстады хъомыс хъуамæ уа æхгæд уæзласæн æртæ машинæйы – къуыримæ.
Бæрæг куыд у, афтæмæй компани «Радужная форель» республикæйы фæзынд 2019 азы. Æрбынат кодта Кæрдзыны хъæуы. Балергæсаджы куыстæн ацы ран ис æппæт уавæртæ дæр: æрдзон суадæттæ, боныхъæд, температурæ.
Фæстаг азты компани йæ куыст иуцасдæр фендæрхуызон кодта æмæ фылдæр æргом аздæхта кæсаджы лæппынтæ уадзыны æмæ сæ æвзарыны куыстмæ. Балæргæсаджы хæрзмыггаджы ахæм куыст æппæт Уæрæсейы дæр кæнынц æрмæстдæр æртæ промышленнон компанийы.
ХУАСДЗАУТЫ Алинæ,
къамтæ систа
ФÆРНИАТЫ Константин
