Нæ газеткæсджытæ куыд зонынц, афтæмæй 7-9 октябры УФ-йы Федералон Æмбырды Федерацийы Советы цæ-уынц Республикæ Цæгат Ирыстоны бонтæ. Уыцы ахсджиаг æхсæнадон-политикон мадзал арæзт цæуы Ирыстон Уæрæсеимæ баиу уæвыны 250 азы æмæ Цæгат Ирыстоны автономи расидыны 100 азы кадæн. Уæрæсейы парламенты уæллаг палатæйы фембæлдтыты архайы регионы делегаци РЦИ-Аланийы Сæргълæууæг Сергей МЕНЯЙЛО æмæ рес-публикæйы Парламенты Сæрдар ТУСКЪАТЫ Таймуразы разамындæй.
Мæскуымæ республикæйæ цы делегаци абалц кодта, уый сконды сты РЦИ-Аланийы Парламент æмæ Хицауады уæнгтæ, стæй æхсæнадон иугæндты минæвæрттæ. Респуб-ликæйы бонты программæйы ис бирæ алыхуызон æмæ цымыдисаг фембæлдтытæ.
Афтæ, фыццаг æмæ дыккаг бонты Федерацийы Советы профилон комитетты бæстон ныхас рауад Цæгат Ирыстоны ахуырады, культурæйы, цæрæнуатон-коммуналон хæдзарады, фæндаггон æмæ инженерон инфраструктурæйы, хъæууон хæдзарады, промышленность æмæ иннæ къабæзты дарддæры райрæзты нысантыл.
Зæгъæм, Сергей Меняйло архайдта, Анд-рей Шевченкойы ра-замындæй Федерацийы Советы федеративон сконды, регионалон политикæ æмæ бынæттон хиуынаффæйады фарстаты фæдыл комитетæн цы уæрæх æмбырд уыд, уым. Республикæйы разамонæг сенаторты æргом раздæхта цалдæр ахсджиаг лыггæнинаг фарстамæ, уыдоны нымæцы – регионы цæрæнуатон-коммуналон комплексы нывылад æмæ дарддæры рацарæзт. Сергей Меняйлойы ныхасмæ гæсгæ, адæмы æрвылбоны царды цæрæнуатон-коммуналон комплексы æнæкъуыхцы куыстæн цы ахадындзинад ис, уый хынцгæйæ,
фæстаг азты зынгæ архайд цæуы амынд къабазы модернизацийыл: ивынц зæронд донуадзæнтæ æмæ электрон тых дæттæн хæтæлтæ, аразынц ног газ-уадзæнтæ, цалцæггонд цæуынц инфраструктурон объекттæ… Уыцы проект-тæ хорзæрдæм зынынц коммуналон ситемæйы уавæрыл, адæмы царды зæрдæзæгъгæ фадæттыл. Зæгъæм, республикæйы газификацийы къæпхæн ныртæккæ схæццæ 95 процентмæ – уыцы бæрæггæнæнмæ гæсгæ, Цæгат Ирыстон ис раззагдæр регионты ‘хсæн.
Уыимæ, Сергей Меняйло куыд фæбæрæг кодта, афтæмæй цæрæнуатон-коммуналон комплексы къабазы нырма ис, фыц-цаградон æгъдауæй иуварс кæнын кæй хъæуы, ахæм фарстатæ. Сæ сæйрагдæр – коммуналон комплексы хæтæлтæн сæ фылдæр хай ихсыд, ивинаг кæй сты, уый. Æмæ уыцы хъуыддаджы регионæн ахсджиаг уыдзæн федералон центры уæлæмхасæн æххуыс.
Боны фæткы ацы æмæ иннæ фарстаты фæдыл раныхас кодтой УФ-йы арæзтад æмæ цæрæнуатон-коммуналон хæдзарады министры хæдивæг Алексей Ересько, Федерацийы Советы профилон комитеты сæрдары фыццаг хæдивæг Владимир Городецкий æмæ иннæтæ.
Æмбырды кæронбæттæны комитеты уæнгтæ уынаффæ рахастой, цæмæй Цæгат Ирыстоны цæрæн-уатон-коммуналон хæдзарады комплексы модернизацийы цалдæр ахсджиаг проекты (уыдоны нымæцы – Дзæуджыхъæу æмæ районты центрты донуадзæнтæ æмæ донцъирæнтæ, сыгъдæггæнæн-канализацион инфраструктурæйы объекттæ æмæ афтæ дарддæр) уæлæфтуаны хуызы хаст æрцæуой «Цæгат Кавказы федералон зылды рæзты» паддзахадон программæмæ.
Ахæм фæткы бындурыл куыстой иннæ комитеттæ дæр.
Афтæ, хъæууон хæдзарад æмæ хойраджы политикæ æмæ æрдзы фæрæзтæй пайда кæныны комитеты уæнгтæ бай-хъуыстой РЦИ-Аланийы Хицауады Сæрдары хæдивæг Икъаты Русланбеджы докладмæ. Ре-гионалон Хицауады вице-премьер бæстон ра-дзырдта, республикæйы агпромышленнон комплекс куыд рæзы, стæй алфамбылай æрдз бахъахъхъæнынæн æмæ æрдзон фæрæзтæй хæ-дзардзинæй пайда кæнынæн цы мадзæлттæ арæзт цæуы, уый тыххæй.
Федерацийы Советы наукæйы, ахуырад æмæ культурæйы комитеты уазджытæ та уыдысты Цæгат Ирыстоны Хицауады Сæрдары хæдивæг Платы Альбинæ æмæ регионалон ведомствæты бæрнон кусджытæ. Комитеты уæрæх æмбырды архайджытæ се ‘ргом аздæхтой республикæйы ахуырад æмæ культурæйы къабæзты абоны уавæр æмæ дарддæры райрæзты фарс-татæм. Ныхасы архайæг уыдысты Федерацийы Советы профилон комитеты сæрдар Лилия Гумерова, РЦИ-Аланийы ахуырад æмæ наукæйы министр Алыбегты Эллæ, Цæгат Ирыстоны культурæйы министр Фидараты Сослан æмæ иннæтæ.
Знон ахæм æмбырдтæ уыд Федерацийы Советы экономикон политикæйы фарстаты фæдыл æмæ иннæ комитетты дæр. Сенатортæ бæлвырд фæндæттæ бахастой æмæ ахадгæ уынаффæтæ сфидар кодтой æмбырдты боны фæткы фарстаты фæдыл…
Мадзалы кæронбæттæн бон – 9 октябры Федерацийы Советы уæнгтæн уыдзæн, РЦИ-Аланийы дарддæры социалон-экономикон рæзты нысантæм бæстон каст кæм цæудзæн, ахæм пленарон æмбырд. Уым сæйраг докладгæнджытæ уыдзысты республикæйы Сæргълæууæг æмæ регионы Парламенты Сæрдар. Уыцы ныхасы бындурыл фидаргонд æрцæудзæн «РЦИ-Аланийы фидæны социалон-экономикон райрæзтæн ахъазгæнæг паддзахадон æххуысы тыххæй» Федерацийы Советы сæрмагонд уынаффæ.
СЛАНТЫ Аслан
