Октябрыхъæуы музыкалон скъолайы уыдис Уæрæсейы культурæйы сгуыхт кусæг Хъайтмазты Зояйы мысæн изæр. Ацы хурæнгæс сылгоймаг стыр æвæрæн бахаста канд Горæтгæрон районы нæ, фæлæ нæ республикæйы музыкалон аивадмæ дæр. Æртын азæй фылдæр разамынд лæвæрдта музыкалон скъолайæн, йе ‘нтыстджын архайды руаджы ацы ахуырадон уагдон ссис нæ регионы хуыздæртæй иу. Ацы бон скъола хæссы Хъайтмазты Зояйы ном.
1978 азы Зоя скъолайы директорæй нысангонд куы ‘рцыди, уæд йæ бынат уыди раздæры бастдзинады хайады. Дыууæ чысыл хатæны сывæллæтты
ахуыр кодтой фортепиано, баян, аккордеон æмæ балалайкæйыл цæгъдыныл. Зоя арæхстджын разамонæг разынд – цыбыр рæстæгмæ ам байгом сты ирон фæндыр, фугæнæн, эстрадон, эстетикон хайæдтæ. Уый нæ, фæлæ ма республикæйы фыццаг иунæгæй зарыны (сольное пение) хайад дæр Зояйы хъæппæрисæй фæзынд Октябрыхъæуы музыкалон скъолайы. Сарæзта ахуырадон проект «Культурæйы университет», æмæ дæс азы дæргъы æнтыстджынæй куыста, архайдтой дзы республикæйы Фысджыты, Композиторты цæдисты уæнгтæ, Ирон æмæ Музыкалон театрты артисттæ, кино æмæ телеуынынады кусджытæ. Арæх-иу æрбахуыдтой уыцы фембæлдтытæм æрмæст музыкалон скъолайы ахуырдзаутæ æмæ ахуыр-
гæнджыты нæ, фæлæ районы цæрджыты дæр. Зояйæн уыдис диссаджы рæсугъд ахастдзинæдтæ республикæйы сфæлдыстадон интеллигенцийы минæвæрттимæ, æмæ уый ахъаз уыдис районы культурон цард бæрзонддæр æмвæзадмæ сисынæн. Цы мадзæлттæ арæзт æрцыд йæ куысты рæстæг Рахизфарсы районы Хъайтмазты Зояйы хъæппæрис æмæ разамындæй, уыдоны нымæц зын зæгъæн у, кæрон сын нæй. Скъолайы рауагъдонтæй бирæтæ адарддæр кодтой сæ музыкалон ахуырад, æмæ сыл уæд дæр Зоя йæ хæст нæ уагъта, æххуыс сын кодта, цин кодта се ‘нтыстдзинæдтыл, царды сын сæ фæндаг бацамыдта.
Зоя схъомыл кодта ахуырдзауты бирæ фæлтæртæ, уыдонимæ – зындгонд эстрадон зарæггæнджытæ Джихаты Рустам, Дойаты Станислав, Сланты Тимур, ирон фæндыр æмæ иннæ музыкалон инструментæй дæсны цæгъдджытæ… Хъайтмазты Зояйы мысæн изæр Октябрыхъæуы музыкалон скъола æрæмбырд кодта йæ раздæры æмæ ныры
ахуыргæнджытæ æмæ ахуыргæнинæгты, хæстæджыты, республикæйы зындгонд музыкантты, æхсæнады минæвæртты. Бирæ хъарм ныхæстæ загъд æрцыд мадзалы дзæнæты бадинаг Хъайтмазоны тыххæй. Уый фæстæ йын байгом кодтой мемориалон фæйнæг.
ГАПБАТЫ Алетæ,
къам систа
Татьянæ ШЕХОДАНОВА
