Нæ газеткæсджытæ куыд зонынц, афтæмæй къуырийы размæ концертон зал «Зарядье»-йы Санкт-Петербурджы Мариинаг театры симфонион оркестры концертæй Ирыстоны иузæрдион хъæбул, амынд театры аивадон разамонæг ГЕРГИТЫ Валерийы разамындæй райдыдтой РЦИ-Аланийы Культурæйы бонтæ Мæскуыйы. 15 октябры та Уæрæсейы Стыр театры историон сценæйыл уыд ацы ахсджиаг историон-культурон мадзалы кæронбæттæн стыр концерт.
Ирыстон Уæрæсеимæ баиу уæвыны 250 азы æмæ Цæгат Ирыс-тоны автономи расидыны 100 азы – ацы зæрдылдаргæ цауты кадæн азы дæргъы бирæ цымыдисаг æмæ дзыллон мадзæлттæ арæзт цæуы, куыд республикæйæн йæхи мидæг, афтæ Мæскуы æмæ иннæ регионты дæр. Республикæйы Культурæйы бонтæ Мæскуыйы дæр баст уы-дысты регионы ацы историон бæрæгбæттимæ.
Къуырийы дæргъы Мæскуыйы цæрджытæ æмæ йæ уазджытæн уыд концерттæ, равдыстытæ, спектакльтæ æмæ æндæр зæрдæмæ-дзæугæ фембæлдтытæ бабæрæг кæныны фадат. Культурæйы бонты архайдтой Тæбæхсæуты Балойы номыл Ирон æмæ Евгений Вахтанговы номыл Уырыссаг академион театрты, стæй Мариинаг театры Дзæуджыхъæуккаг филиалы, РЦИ-Аланийы паддзахадон филармонийы сфæлдыстадон коллективтæ æмæ зарæггæнджыты къорд «Алания»-йы уæнгтæ, ирыстойнаг нывгæнджытæ… Уымæй уæлдай, бонты программæйы уыдысты ирон чъириты фестиваль, бæрæгбоны ракуывд Сыгъдæг Мады-Майрæмы мæскуыйаг алайнаг аргъуаны æмæ æндæр фембæлдтытæ æмæ дзыллон
мадзæлттæ.
Культурæйы бонтыл бæрнон ведомствæты минæвæрттæ æппæт хъарутæй бацархайдтой, цæмæй уыцы мадзæлтты фæрцы ирд æмæ æппæтвæрсыгæй æвдыст æрцæуой нæ республикæйы культурæ, йæ истори æмæ абоны цард.
Æмæ ныр, Культурæйы бонтæ куы ахицæн сты, уæд фидарæй
зæгъæн ис, амынд культурон акцийы программæйыл чи бакуыста, уыцы бирæ адæмы зæрдиаг архайд кæй фæрæстмæ, уый. Цæгат Ирыстоны Культурæйы бонтæ мæскуыйæгтæ æмæ горæты уазджытæн зæрдылдаргæ цау кæй ра-уадысты, уый дызæрдыггаг нæу…
Культурæйы бонты кæронбæттæн изæрмæ Стыр театрмæ цы бирæ адæм æрбамбырд, уыдонæн арфæ ракодта РЦИ-Аланийы Сæргълæу-уæг Сергей Меняйло.
– Къуырийы дæргъы мæскуыйæгты зонгæ кодтам нæ алæмæты рæсугъд республикæимæ – йæ рагон истори, хъæздыг культурæ, фыдæлтыккон æгъдæуттимæ, йæ ивгъуыды хабæрттæ, абоны цард æмæ фидæны нысантимæ. Мæ зæрдæ дарын, Культурæйы бонты чидæриддæр архайдта, уыцы адæмæй алкæцыдæр Ирыстоны фарнæй кæй фæхай-джын, ууыл, – фæбæрæг кодта регионы Сæргълæууæг.
Уый фæстæ кадджын æмбырды раныхас кодта УФ-йы Федерацийы Советы Сæрдар Валентинæ Матвиенко.
– Ирыстон Уæрæсеимæ куы баиу, уæд не стыр Фыдыбæстæ фæхъомысджындæр, хæдбындур æмæ рагон истори, бирæвæрсыг æмæ хъæздыг культурæйы хицау чи у, уыцы ирон адæмы фарнæй. Уæд Ирыстон сси нæ бирæнацион бæстæйы æнæфæхицæнгæнгæ хай, – бафиппайдта уæрæсейаг парламенты уæллаг палатæйы спикер.
Арфæйы ныхас чи загъта, уыдонимæ уыд Республикæ Хуссар Ирыстоны Президент Гаглойты Алан дæр. «Цæгат Ирыстоны Культурæйы бонтæ баст сты, уæлдай ахсджиаг историон нысаниуæг цы бæрæгбæттæн ис, уыдонимæ. Уыцы бæрæгбæттæ ирд æвдисæн сты, Ирыстон æмæ Уæрæсейы ахастдзинæдтæ куыд рæзыдысты æмæ хъомысджындæр кодтой, республикæ æмæ йæ адæмы царды цы фæрныг ивддзинæдтæ цыд, уыдонæн», – загъта Гаглойы-фырт.
Уыцы фембæлды паддзахадон хæрзиуджытæ æмæ кадджын нæмттæ лæвæрд æрцыд, йе ‘рвылбоны архайдæй Ирыстонæн ном чи кæны, республикæ æмæ æппæт бæстæйы дарддæры райрæзтмæ аккаг æвæрæн чи хæссы, уыцы адæмы стыр къордæн. Афтæ, Гергиты Валерийæн саккаг кодтой кадджын ном «Ирыстоны фæллойы хъæбатыр», «Госстройнадзор»-ы Мæскуыйы облæсты управленийы разамонæджы фыццаг хæдивæг Æлборты Тамерлан та райста майдан «Ирыстоны намысæн». Уыдонæй уæлдай, хæрзиуджытæ лæвæрд æрцыд æнæниздзинад хъахъхъæнынады, аивад æмæ иннæ къабæзты кусджытæн.
Концертон-театрализацигонд равдыст та байгом кодтой Гергиты Валери æмæ Стыр театры симфонион оркестр. Дарддæр сценæмæ радыгай рахызтысты адæмон кæфтыты паддзахадон ансамбль «Алан»-ы, зарæггæнджыты къорд «Алания»-йы, Мариинаг театры Дзæуджыхъæуккаг хайады балетон къорды артисттæ, Цæрикъаты Феликс, Дулаты Дзамболат, Цыбырты Шота, Джиоты Вероникæ æмæ иннæтæ.
СЛАНТЫ Аслан
